Maganu Musenna Aarooni hadhine Ferioonira togo yiiyye yiinsa: ‘Mannaˈya agura giwittoro toronde soyeemmo.’ Torondu, dureessuno buxichuno gatikki Gibitsete manni baalunku minira ei. Gibitsete gobbara torondu nookkiwi dino. Israeelete manni heeˈrannote Geeseemi yinanni baattora kayinni torondu dino. Shoolkihunni kayise dirrino qoomami Gibitsete manna calla gawajjino. Hakkiinni Feriooni Muse togo yii: ‘Atinna mannikki hadhinannina Yihowa konne toronde hoolanno gede huucceˈˈe.’ Yihowa toronde hoolita kayinni Feriooni xaano Israeelete manna diagurino. Feriooni Maganu assi yiinosire assiyya?

Yihowa togo yii: ‘Feriooni mannaˈya agura giwiro, Gibitsete manni saada dhiwante reyitanno gede asseemmo.’ Layinki barra Gibitsete manni saada reya hanaffu. Israeelete saada kayinni mitteno direyitino. Ikkirono Feriooni xaano Yihowa yiinosire dimacciishshino; xaano Israeelete manna diagurino.

Hakkiinni Yihowa Muse galagale Feriooniwa mare buluulo fincanno gede kulisi. Hakku buluuli buko ikke Gibitsete gobba baala woˈmi. Buko Gibitsete manninna saadansa bisi darshanno gede assitu. Feriooni kayinni xaano Israeelete manna haˈrannota hooli.

Yihowa Muse galagale mare Ferioonira togo yaanno gede kulisi: ‘Xaano mannaˈya agura  giwootto? Gaˈa kaade xeenimma dirriseemmo.’ Layinki barra Yihowa kaade, banqonna giira dirrisi. Gibitsete gobbara hattoo kaade dirrite horo diegentino. Kaade haqqenna wixa baala uullate gantu; Geeseemi baattora kayinni kaade didirritino. Hakkiinni Feriooni togo yii: ‘Hadhinanni gede agureemmoˈnena Yihowa konne qoomama dirrisa aguranno gede huuccenke!’ Kaadenna xeenu dirra agurita kayinni, Feriooni Israeelete manna haˈrannota hooli.

Hakkiinni Muse togo yii: ‘Gaˈa kaadetewiinni gattino haqqe kanchafaru coˈo asse itanno.’ Lowo kanchafari daye gattino haqqe ite gudi. Konni daafira Feriooni togo yee huucciˈri: ‘Yihowa konne kanchafare hoolanno gede huucceˈˈe.’ Yihowa kanchafare hooli gedensaannino, Feriooni Israeelete manna haˈrara diagurino.

Yihowa Muse ‘Angakki iima qolte kayisi’ yiisi. Hakkiinni xiˈmu tunsichi gobba gudise amadi. Gibitsete manni sase barra woˈma mittoreno laˈˈa didandiino. Israeelete manni noowi kayinni xawaabbaho.

Hakkiinni Feriooni Muse togo yii: ‘Atinna mannikki haˈra dandiitinanni. Saadaˈne kayinni koye wortine hadhe.’ Muse Feriooni togo yii: ‘Maganoho kakkalo shiqishiˈneemmo gede saadanke adhine haˈneemmo.’ Konni daafira Feriooni lowo geeshsha hanqi. Isi togo yee hanqe coyiˈri: ‘Albiˈyanni hoˈli! Layinkita kowiicho afummohero sheemmohe.’