Musa dingangi Harun naul᷊ị tatanatang Mawu ini si Firaun: ’Mạeng i kau madiri měmala umatẹ̌-Ku, Iạ sarung mapakarěntang lango sarang banuanu.’ Bọu ene lawọ lango němenẹ bal᷊eng tau Misirẹ̌, bọu taumata kalạ sarang taumata masusah. Banua ene napenẹu lango. Katewe su Gosyen, tampạ u tau Israel, tawẹ apa lango. Něnětạ bọu tulah kaěpạe ini, kětaeng tau Misire kinahinong tulah. Firaun naul᷊ị, ’Pẹ̌dorongko si Yehuwa gunang mapakailang manga lango ini, bọu ene tau Israel botonge matamai.’ Katewe su apang Yehuwa seng napakailang lango, naung i Firaun nẹ̌bal᷊ui. Kange i Firaun mẹ̌tobatẹ̌?

Yehuwa naul᷊ị, ’Mạeng i Firaun tawe měmala umatẹ̌-Ku, manga binatangu tau Misire sarung masakị kụ mate.’ Dịěllone, ene nariadi. Katewe binatangu tau Israel tawe nate. Maning kerene, i Firaun tatapẹ̌ madiri měmala tau Israel.

Bọu ene Yehuwa něngoro si Musa saụ pẹ̌bal᷊ị sarang i Firaun kụ pěnawuhẹ̌ awul᷊ẹ̌ su udara. Awul᷊ẹ̌ ene nasawuhẹ̌ kụ diměkạ su tau Misirẹ̌, kụ nakakoạ badangu tau Misirẹ̌ dingangu manga binatang napenẹu bisul᷊ẹ̌ matědụ-tědụ. Katewe, Firaun tatapẹ̌ madiri měmala tau Israel.

Yehuwa saụ něngoro si Musa pẹ̌sombang dingangi Firaun kụ pěhabarẹ̌, ’Apa i kau bědang tawe mapakawebasẹ̌ umatẹ̌-Ku? Dịěllo, tahiti eisẹ̌ sarung mariadi su Misirẹ̌.’ Dịěllone, Yehuwa někoạ tahiti eisẹ̌, lai dělụ dingangu putung.  Tau Misirẹ̌ bědang tawe nakasilo badai kerene. Kěbị kalu dingangu sasuang narusa. Katewe, su Gosyen tawẹ apa barang nariadi. Firaun naul᷊ị, ’Pẹ̌dorongko si Yehuwa tadeạu kěbị ini měngědo! Bọu ene i kamene botonge matamai.’ Katewe su apang tahiti eisẹ̌ něngědo, naung i Firaun saụ nẹ̌bal᷊ui.

Bọu ene i Musa nẹ̌bera, ’Kal᷊imbotong sarung kumaěng sasuang tawe narusa ual᷊ingu tahiti eisẹ̌.’ Jutane kal᷊imbotong kimaěng kěbị apang nal᷊ěmbe su kěhu dingangu su kalu. I Firaun saụ naul᷊ị, ’Pẹ̌dorongko si Yehuwa tadeạu manga kal᷊imbotong ini mailang.’ Katewe su tempong kal᷊imbotong seng nailang, Firaun tatapẹ̌ matul᷊ikětị.

Yehuwa naul᷊ị si Musa, ’Hengkẹ limanu sarang langị.’ Su tempo ene, langị apidu nakoạ sěbạe marěndung. Karěngụe tělu ěllo, tau Misirẹ̌ tawe nakasilo apa-apa. Katewe su tampạ u tau Israel tatapẹ̌ matualagẹ̌.

Firaun naul᷊ị si Musa, ’I kau dingangu tau Israel botonge matamai. Katewe manga binatang i kamene abe wawa.’ Musa naul᷊ị, ’I kami harusẹ̌ mẹ̌bawa manga binatang i kami gunang koateng sasěmbah.’ I Firaun sěbạe nẹ̌pědu. I sie nẹ̌bera dingangu tingihẹ̌ maihạ, ’Sěbang! Mạeng i kau saụ mandaị, i kau takụ pateng.’