Mozesi ndi Aroni anguluta kuchikambiya Farawo vo Chiuta wanguŵatuma kuti: ‘Asani ulekengi kuzomereza ŵanthu ŵangu kuti aluti, nditumizengi viphanga mucharu cha Egipiti.’ Viphanga vinandi pamwenga kuti vinyezi vikuluvikulu vakuluma vingusere mu nyumba za Aegipiti, akukhupuka ndi akavu viyo. Mucharu cho munguzaza viphanga. Kweni muchigaŵa cha Gosheni cho mwajanga Ayisraele mwengavi viphanga. Mulili wachinayi wenuwu kweniso yinyaki yo yinguchitika pavuli paki, yingukwaska Aegipiti pe. Farawo wangukambiya Mozesi kuti: ‘Pempha Yehova kuti watuzgepu viphanga ivi. Ŵanthu ŵinu angaluta.’ Kweni Yehova wati wamalisa mulili wa viphanga, Farawo wangusintha maŵanaŵanu ngaki. Kumbi Farawo wangusambirapu kanthu?

Yehova wanguti: ‘Asani Farawo waleka kuzomereza ŵanthu ŵangu kuti aluti, viŵetu va Aegipiti vitamengi ndi kufwa.’ Mawa laki, viŵetu va Aegipiti vingwamba kufwa. Kweni va Ayisraele vingufwa cha. Chinanga kuti venga viyo, Farawo wangukana kuthera ndipu wanguŵazomereza cha kuluta.

Pavuli paki, Yehova wangukambiya Mozesi kuti waluti kwaku Farawo ndipu wakawulusiyi chotu muchanya. Chotu chingusambuka fuvu ndipu fuvu lo lingudikiya Aegipiti wosi. Fuvu lenili linguchitisa kuti Aegipiti wosi ndi viŵetu vawu aje ndi vilonda vakuŵaŵa ukongwa. Kweni Farawo wangukana mbwenu kuzomereza kuti Ayisraele aluti.

Yehova wangutuma Mozesi kuti waluti so kwaku Farawo. Mozesi wangukamba kuti: ‘Kumbi ukana mbwenu kuzomereza ŵanthu ŵangu kuti aluti?  Mawa ndiwisengi vuwa yikulu.’ Mawa laki, Yehova wanguwisa chivuwa chikulu chamalimphezi ndi motu. Chenga chivuwa cho chenga chechendawepu mucharu cha Egipiti. Vimiti vosi kweniso mbewu vingunangika kupatuwaku va ku Gosheni. Farawo wangukambiya Mozesi kuti: ‘Pempha Yehova kuti vuwa yimali! Pavuli paki mulutengi.’ Kweni vuwa ya chimphepu yati yamala, Farawo wangusintha maŵanaŵanu ngaki.

Pavuli paki, Mozesi wangukamba kuti: ‘Sonu, azombi aryengi mbewu zosi zo zingujaku chimphepu chati chamala.’ Azombi anandi angurya chechosi cho chinguja muminda ndi muvimiti. Farawo wangukambiya Mozesi kuti: ‘Pempha Yehova kuti watuzgepu azombi.’ Kweni Yehova wati watuzapu azombi, Farawo wangukana mbwenu.

Yehova wangukambiya Mozesi kuti: ‘Tambaluliya janja laku kuchanya.’ Nyengu yeniyo, kuchanya kunguchita mdima. Aegipiti awonanga chechosi cha kwa mazuŵa ngatatu kweni Ayisraele pe ndiwu ŵenga ndi ukweru munyumba zawu.

Farawo wangukambiya Mozesi kuti: ‘Iwi ndi ŵanthu ŵaku mungaluta. Kweni viŵetu vinu muvisiyi.’ Mozesi wanguti: ‘Titenere kuluta ndi viŵetu vidu kuti tikavipereki sembi kwaku Chiuta widu.’ Farawo wangukwiya ukongwa. Iyu wangudaniriza kuti: ‘Tuwapu yapa! Asani ndakuwona so, ndikubayengi.’