Ja Moisés soka Aarón waj yil-e ja faraón bʼa yajelyi ja rason it bʼa Dyos: «Ta mixa jeka ja jchonabʼi, oj jekawi tukʼ ja bʼa chonabʼi». Och jitsan tukʼ ja bʼa snaje ja swinkil Egipto, ama rikoʼe ma pobreʼe. Yibʼanal ja chonabʼi bʼutʼ tukʼ. Pe ja bʼa slujmal Gosén, ja bʼaye ja israʼelenyo, mini jun tukʼ ajyi. Ja xchanil desgrasya it soka tuk jakumi kechan ixtalajiye ja swinkil Egipto, pe miyuk ja israʼelenyo. Ja faraón spatayi skʼujol ja Moisés: «Kʼanayi ja Jyoba aya kʼot tekʼan ja tukʼi, sok tsaʼan jawa chonabʼi ojxa bʼobʼ wajuk». Pe yajni ja Jyoba ya tejkʼajuk, ja faraón mi cha jekwani. ¿Oj maʼ snaʼ kʼinal jun kʼakʼu ja faraón?

Ja Jyoba cha yala: «Ta ja faraón mi sjeka ja jchonabʼi, ja xchanteʼik ja swinkil Egipto oj koʼ sbʼaj xchamel sok oj chamuke». Ja bʼa pilan kʼakʼu, ja chanteʼiki chʼak chamuk. Jaxa bʼa israʼelenyo mi chami. Ama jachuk, ja faraón mini kʼokxi, yujni jel kaprechudo.

Anto, ja Jyoba sjeka ja Moisés bʼa akumxuk ja bʼay ja faraón sok a-sjip taʼan ja bʼa ikʼi. Ja taʼani pax jastal tsʼubʼil luʼum bʼa sbʼutʼu el ja ikʼi sok koʼ sbʼaje yibʼanal ja swinkil Egipto. Jaxa yeʼnle soka xchanteʼe el sbʼaje yajal kʼoʼonik. Pe ja faraón cha mini sjeka ja israʼelenyo.

Ja Jyoba sjeka ja Moisés bʼa yaljel yabʼ ja faraón: «¿Mito maʼ oja jek ja jchonabʼi? Ja jecheli oj ka koʼuk bʼat». Yajni el ja pilan kʼakʼu, ja Jyoba ya koʼuk bʼat, chawuk sok kʼakʼ. Mini bʼa koʼel sbʼaj jachuk ja  Egipto. Xchʼaka yibʼanal ja teʼiki sok ja alajiki, pe miyuk ja bʼa Gosén. Anto ja faraón yala: «Kʼanayi ja Jyoba akʼot tekʼan ja it. Jachuk ojxa bʼobʼ wajanik». Pe yajni kʼot tekʼan ja bʼat soka jaʼi, ja faraón cha jom spensar.

Tsaʼan, ja Moisés yala: «Ja wego ja jachʼbʼeniki oj sloʼe ja kʼulik mi xchʼaka ja tsatsal bʼati». Jitsan jachʼbʼenik sloʼowe yibʼanal ja jas kanel ja bʼa teʼiki sok ja bʼa alajiki. Ja faraón spatayi skʼujol ja Moisés: «Kʼanayi ja Jyoba aya eluk ja jachʼbʼenik it». Pe yajni ja Jyoba ya eluk, ja faraón mitoni kʼokxi.

Jaxa Jyoba yala yabʼ ja Moisés: «Jacha jawa kʼabʼ bʼa satkʼinal». Yajni sjacha, wegoxta kʼikʼbʼi. Ja swinkil Egipto mini bʼobʼ ilwanuke oxe kʼakʼu. Kechan ja israʼelenyo ajyiyujile ijlabʼ ja bʼa snaje.

Ja faraón yala yabʼ ja Moisés: «Ja weʼn soka wa chonabʼi oj bʼobʼ wajanik, pe miyuk jawa chanteʼexi». Ja Moisés sjakʼa: «Tʼilani oj kitikon ja jchantetikoni bʼa yajelyi jastal majtanal ja jDyostikoni». Ja faraón jel tajki sok awani: «¡Kaxa ja ili! Ta kilawa pilan ekʼele, oj mila».