Моисей биле Аарон фараонга Бурганның сөстерин дамчыдар дээш чедип келген: «Мээң чонумну салбас болзуңза, чериңче ызырар сээктерни чоргузуптар мен». Имилеме ызырар сээктер Египетте бай-даа, ядыы-даа улустуң бажыңнарын бүргей апкан. Олардан чаштынар арга чок болган. Ынчалза-даа израильчилерниң чурттап турган черинге, Гесемге, ол сээктер турбаан. Бо болгаш дараазында шаажылалдардан чүгле египетчилер хинчектенген. Фараон Моисей биле Аарондан: «Ол бужар сээктерни ойладыптар кылдыр, Иеговадан дилеп көрүңер. Чонуңарны салыптар мен» — деп чаннып дилээн. Кажан Иегова сээктерни ойладыптарга, фараон өскээр боданыпкан. Таанда фараон угаан кирбээни ол бе?

Иегова мынча дээн: «Фараон чонумну салбас болза, египетчилерниң кодан малы аарааш, өлүп калыр». Дараазында хүн мал-маган өлүп эгелээн. А израильчилерниң чаңгыс-даа малы өлбээн. Ынчалза-даа фараон улаштыр дедирленип, чонну салбаан.

Иегова Моисейни фараонче катап баргаш, дээрже хүлдү чажыптарын дужааган. Хүл агаарны дола бергеш, египетчилерже бадып эгелээн. Оон оларның база мал-маганының мага-бодунга ириңниг балыглар тыптып келген. Ынчалза-даа фараон израильчилерни салбаан.

Иегова Моисейни фараонче мындыг сөстер-биле база катап чорудупкан: «Ам-даа  мээң чонумну салбас деп тур сен бе? Эртен сээң чериңче күштүг долуну чорудар мен». Иегова дараазында хүнде долуну, диңмирээшкинни, отту чорудупкан. Ындыг хат-шуурган Египетке кажан-даа болбаан. Шупту ыяштар, дүжүттер узуткаттырган. А Гесем чер когараваан. Фараон Моисей биле Ааронга: «Ол хат-шуурганны соксадыр кылдыр, Иеговадан дилеп көрүңер! Ооң соонда чон чоруп болур» — дээн. Долу биле чаъс соксай бээрге, фараон өскээр боданыпкан.

Оон Моисей мынча дээн: «Долунуң соонда арткан чүүлдү шартылаа чиптер». Мөөң шартылаа шөлдерде болгаш ыяштарда шупту чүүлдерни узуткап каапкан. «Иеговадан шартылааларны ойладыптар кылдыр дилеп көрүңер» — деп, фараон дилээн. Иегова ону кылып каарга-даа, фараон чонну салбаан.

Иегова Моисейге: «Холуңну дээрже углай сунувут» — дээн. Ол-ла дораан дүмбей караңгы дүжүпкен. Египетчилер үш хүн ишти чүнү-даа көрүп чадап каан. Чүгле израильчилерниң чери чырык болган.

Фараон Моисейге: «Чонуң-биле чоруп болур сен. Чүгле мал-маганыңарны арттырып калыңар» — дээн. Моисей аңаа: «Чок, Бурганывыска өргүл кылыр дээш, мал-маганывысты ап алыр бис» — деп харыылаан. Фараон аажок килеңнеп: «Моон чоруп чор! Мээң караамга көстүр болзуңза, сени өлүрүп каар мен!» — деп алгырган.