Te Moisés sok te Aarón bajtʼ yilik te faraón swenta ya yalbeyik yaʼiy te kʼopetik ini: “Teme maba ya awakʼ lokʼel te lum kuʼune, yame jtikun mukʼul usetik ta lumkʼinal”. Te mukʼul usetik-abi ya xtiʼawanik. Bayal ta mil usetik och ta sna te egipcioetik, manchukme jkʼulejetik o meʼbaetik. Spisil te lumkʼinal noj ta mukʼul usetik. Pero, maba och ni jkojtuk ta lum Gosén te banti nainemik te israeletike. Te schanebal wokolil ini sok te yantik te talik ta patil jaʼnax kʼot ta stojolik te egipcioetik, te israeletik maba utsʼinotik stukelik. Te faraón la yalbey te Moisés: “Kʼanbeya te Jehová te yakuk slokʼes bael te mukʼul usetik, ta patil ya xjuʼ xlokʼ bael te lum awuʼune”. Pero te kʼalal lokʼ bael te mukʼul usetike, te faraón chaʼjelon te snopjibal yuʼune. ¿Yabal akuy te ay bin-ora ya xjelon te snopjibal yuʼun te faraone?

Ta patil te Jehová la yal: “Teme maba ya yakʼ lokʼel te faraón te lum kuʼune, te chambalametik yuʼun te egipcioetik yame stsakotik ta chamel sok yame xlajik”. Ta yan kʼajkʼal kʼot ta pasel te bin la yal te Jehová, pero ma laj stukel te schambalamik te israeletike. Pero, te faraón ma la schʼuun kʼop ta yan buelta, melel tulan te yoʼtane.

Jich yuʼun te Jehová la yalbey mantal te Moisés te yakuk xbajtʼ sbujkʼiy moel tan te banti ay te faraón. Te tan-abi kʼatpʼuj jich bitʼil tsʼubil lum te la spuk te ikʼe, jich kʼot ta stojol te egipcioetik. Te tsʼubil lum-abi la yakʼ ejchʼenajuk sbakʼetal te ants winiketik sok te chambalametik te bayal skʼuxule. Pero, te faraón jaʼnix jich la yal te ma xyakʼ lokʼel te israeletike.

 Te Jehová la schaʼtikun te Moisés ta stojol te faraón yuʼun jich ya yalbey ini: “¿Matobal ya akʼan ya awakʼ lokʼel te lum kuʼune? Pajel ya kakʼ tal bat”. Ta yan kʼajkʼal, te Jehová la yakʼ tal bat, chawuk sok kʼajkʼ. Te tulan yikʼal jaʼal-abi, maʼyuk jich kʼaxem ta Egipto. La slajin spisil te teʼetik sok te lumkʼinale, yan te lum Gosén maba taot stukel. Jich yuʼun te faraón la yal: “Kʼanbeya te Jehová te akʼa skom te wokoliletik ini, jich ya xjuʼ xlokʼex bael”. Pero te kʼalal kom te jaʼal sok te bate, te faraón jelon te snopjibal yuʼune.

Jich yuʼun te Moisés la yal: “Ta ora ini, te kʼulubetik yame slajinik te bintik maba la slajin te tulan yikʼal jaʼale”. Te kʼulubetik-abi jteb ma pajal sok te chil. Bayal miyon ta kojt kʼulubetik la sweʼik te teʼetik sok te bintik ay ta lumkʼinale. Te faraón jich la skʼanbey te Moisés: “Kʼanbeya Jehová te yakuk slokʼes bael te kʼulubetike”. Pero te kʼalal la slokʼes bael Jehová te kʼulubetike, te faraón maba la sjel te stulanil yoʼtane.

Ta patil te Jehová la yalbey te Moisés: “Toya moel akʼab ta chʼulchan”. Kʼalal jich la spase, ijkʼub kʼinal ta jkʼaxel. Te egipcioetik maʼyuk bin juʼ yuʼunik yilel ta oxeb kʼajkʼal. Jaʼnax te israeletik la yilik sakal kʼinal stukelik.

Te faraón jich la yalbey te Moisés: “Te jaʼat sok te lum awuʼun ya xjuʼ ya xlokʼex bael, pero ijkʼitayaik te chambalametik awuʼunike”. Te Moisés jich la sut: “Ya kikʼtik bael te chambalametik kuʼuntik swenta ya kakʼtik ta chikʼbil majtʼanil ta stojol te Dios kuʼuntike”. Te faraón lijkʼ slab yoʼtan sok jich tulan kʼopoj: “¡Lokʼan bael ta jtojol! Teme ya kilat ta yan buelta, ya jmilat”.