Mose kuenda Arone va enda ku Fareo oco va ece kokuaye esapulo lia Suku liokuti: ‘Nda kua tavele oku eca omanu vange, numa asunga olonyi vofeka.’ Asunga olonyi a iñila volonjo via va Egito, ci kale ohuasi ale ohukũi. Vofeka yosi mue yukile olonyi vialua. Pole, ofeka yo Gosene kuna kua kala va Isareli ka kua kaile olonyi. Oku upisa kefengi eli liakũala, afengi a kuamamo a veta lika va Egito. Fareo wa livondela hati: ‘Pingi ku Yehova oco a tupe efengi eli. Omanu vaye citava okuti va enda.’ Pole, eci Yehova opa olonyi vofeka, Fareo wa pongolola ovisimĩlo viaye. Fareo wa lilongisila hẽ kefengi eli?

Yehova wa popia hati: ‘Nda Fareo ka tavele oku eca omanu vange, ovinyama via va Egito vi kuata uveyi kuenda vi fa.’ Eteke lia kuamamo ovinyama via fetika oku fa. Pole, ovinyama via va Isareli ka via file. Lopo Fareo wa tĩlisa utima waye kuenje ka tavele oku eca omanu.

Noke Yehova wa sapuila Mose oco a ende vali ku Fareo kuenda oku imba etiko vilu. Etiko lia pongoloka oneketela okuti ya lisanduila vofeka kuenje ya veta omanu vosi va va Egito. Oneketela ya koka apute amue avĩ komanu vosi vo Kegito kuenda kovinyama viavo. Pole, lopo Fareo ka tavele oku eca va Isareli.

Yehova wa tuma Mose oco a tiukile ku Fareo lesapulo Liaye liokuti: ‘Handi o kasi oku likala oku  tuma omanu vange? Hẽla ndokisa ociwe vofeka.’ Keteke lia kuamamo Yehova wa tuma ociwe, locikẽlu kuenda ondalu. Ehunguhungu liaco, linene okuti ka lia la muiwa Kegito. Oviti viosi kuenda ovikũla via nyõleha, pole, kofeka yo Gosene, ka kua pitile ociwe. Fareo wa popia hati: ‘Pingi ku Yehova oco ka ku ka kale vali ociwe! Kuenje vosi yene citava oku enda.’ Eci ombela kuenda ociwe via imũha Fareo wa pongolola ocisimĩlo caye.

Noke Mose wa popia hati: ‘Kaliye olohuma vi laika oku lia ovikũla viosi via supa kociwe.’ Olohuma vialua via lia ovina viosi via supa vovapia kuenda voviti. Fareo wa livondela hati: ‘Pingi ku Yehova oco a tundise olohuma evi.’ Pole, ndaño okuti Yehova wa tundisa olohuma, handi lopo Fareo wa tĩlisa utima waye.

Yehova wa sapuila Mose hati: “Oluĩla eka liove kilu.” Vepuluvi liaco, ilu lia tekãva. Vokuenda kuoloneke vitatu va Egito ka va tẽlele oku mola ocina cimue ale omunu umue. Pole, va Isareli vosi va kala locinyi volonjo viavo.

Fareo wa sapuila Mose hati: ‘Ove kumue lomanu vove, kuendi. Pole, ovinyama viene vi siale kulo.’ Mose wa popia hati: ‘Tu sukila oku ambata ovinyama vietu oco tu ka vi lumbe ku Suku yetu.’ Fareo wa temẽle calua. Omo liaco, wa kaluka hati: ‘Tunda kulo! Nda weya vali kulo, ndu ku ponda.’