Guyé Moisés ne Aarón ra nuu Faraón ne gúdxicaʼ laabe xi ná Dios: «Pa qué gudiiluʼ lugar guiree xquidxeʼ, zuseendaʼ tábano ndaaniʼ guidxi riʼ». Tábano nga bialazi roʼ ni riguiru. Mil de bialazi bidxá ra lidxi ca egipciu, ra lidxi ca ricu ne ca pobre. Bidxá tábano ndaaniʼ guidxi que. Peru lugar ni láʼ Gosén, ra nabeza ca israelita, qué ñuu nin tobi. Guidapa plaga riʼ ne cani beeda despué bininá ni ca egipciu si, peru ca israelita que coʼ. Gudxi Faraón Moisés ca diidxaʼ riʼ: «Gunabaʼ Jiobá cuee ca bialazi riʼ, ne zudieeʼ lugar guiree guidxi stiluʼ». Ora gulee Jiobá laacame maʼ qué niná Faraón niree guidxi que. ¿Ñee rábiluʼ ziuu dxi guiene Faraón la?

Despué guníʼ Jiobá: «Pa qué gudii Faraón lugar guiree xquidxeʼ, zaca huará ne zati ca maniʼ stiʼ ca egipciu». Sti dxi que guca ni guníʼ Jiobá, peru ca maniʼ stiʼ ca israelita que, qué ñácacaʼ gastiʼ. Nin ne ngue qué nuzuubaʼ Faraón diidxaʼ purtiʼ neciu laa.

Ngue runi, biʼniʼ mandar Jiobá Moisés cheʼ ra nuu Faraón sti biaje ne guicaa caadxi dé ludé ne gulaa ni lu bi. Dé ni bindaa Moisés que bireeche ni lu bi ne bidxá ni ladi ca egipciu. Ne pur ngue, biree jma guiʼdxuʼ ni bininá ládicabe ne ladi ca maniʼ stícabe. Peru nin ne zaqué laaca qué niná diʼ Faraón niree guidxi que.

Biseendaʼ Jiobá Moisés ra nuu Faraón sti biaje para gabi laabe ndiʼ: «¿De yanna nga qué naluʼ  guiree xquidxeʼ la? Pue guixíʼ zusabaʼ granizu ndaaniʼ guidxi riʼ». Sti dxi que, bisaba Jiobá granizu, rayu ne gui. Ngue nga tormenta ni jma naroʼbaʼ biaba Egipto. Binitilú ni yaga ne ca layú stiʼ ca egipciu, peru cani nuu Gosén qué ñácacaʼ gastiʼ. De raqué guníʼ Faraón: «Gunabaʼ Jiobá gucueezadxí guiráʼ ndiʼ, óraca maʼ zanda chetu». Peru casi gulezadxí granizu ne nisaguié que, maʼ qué ñuni diʼ Faraón ni guníʼ.

Ngue runi, guníʼ Moisés: «Yanna la? zó ca langosta, guiráʼ yagahuiiniʼ ni qué nunitilú tormenta que». Ca langosta ca nga ti clase uxharu (saltamontes) naroʼbaʼ. Millón de langosta gudocaʼ guiráʼ ni biaana lu ca yaga ne lu ca layú que. Gudxi Faraón Moisés: «Gunabaʼ Jiobá cuee ca langosta ca de raríʼ». Gulee si Jiobá ca langosta que, qué nusaana Faraón de ñaca neciu.

De raqué, gudxi Jiobá Moisés: «Gundisaʼ náʼ luguiáʼ». Ne ora bíʼnibe ni, nagueendaca bicahui. Chonna gubidxa qué ñanda ñuuyaʼ ca egipciu que gastiʼ. Ca israelita si gúpacaʼ biaaniʼ ra lídxicaʼ.

Faraón gudxi Moisés: «Lii ne guidxi stiluʼ zanda chetu, peru lagusaana ca maniʼ stitu raríʼ». Moisés bicabi laabe: «Naquiiñeʼ chinedu ca maniʼ riʼ para gudiʼdu ofrenda Dios». Guizáʼ bidxichi Faraón ne bicaa ti ridxi: «¡Biree de raríʼ! Pa guuyaʼ lii sti biaje, zuuteʼ lii».