Musa ung’olo ni Farao nia ebidok ungo kendo i bang’e. Ento i wang’ niweko Farao, eyero ire kumae: ‘I diewor ma tin, awiya ma kayu ma co ceke mi Misiri bitho, niai i kum kayu pa Farao ma jany iwi komker pare nitundo i kum kayu pa jatic.’

Yehova uyero ni nyithindho mir Israel nia giyik cam moko ma segi. Eyero igi kumae: ‘Wuthum nyathi rombo kunoke nyathi diel ma oro pare acel, man wuketh kum rimbe moko i kum ng’et dhugola mwu man iwi riu mi dhugolane. Wuvul ringe man wubicame ku kwen ma thobi mbe i ie. Wukenduru, wurony wara mwu i thiendwu, man wubed ayika. Abigonyowu i diewor ma tin.’ M’umbe jiji, lembe maeno unyayu mutoro lee i nyithindho mir Israel!

I diewor ma cing’ nica, malaika pa Yehova ucidho i udi acel acel mi Misiri. E kubang’ ot ceke ma juwiro ngo rimo i wang’ dhugolane nyathin ma co ma kayu utho. Ento malaikane umulo ngo kum dhanu ceke m’i udi ma juwiro rimo i dhugolane. Awiya ma co ma kayu utho i ot moko ci mi Misiri, dok ebed i ot pa jalonyo kadi pa jacan. Ento i bang’ nyithindho mir Israel, nyathin moko acel de mbe m’utho.

Kadok wod Farao ma kayu bende utho. Kawoni dong’ Farao unwang’u nia gin m’ecopo timo mbe! E ndhundhu nica, elwong’o Musa gikud Harun, man  eyero igi kumae: ‘Wuwoki. Wuai cen ku keni. Wucidh wutim ni Mungu mwu, wucok lim mwu, man wucidhi!’

Nyithindho mir Israel giwok kud i Misiri ku diewor kinde ma dwi ulero ng’om ma ber; giwok ma gicokiri juruotman i suru migi. Gibino dhanu 600 000, jumaco ku jumamon man awiya ma thindho. Bende dhanu mange ma wendgi lee gicidho karacelo kugi kara gin bende gitim thier ni Yehova. Kawoni dong’ nyithindho mir Israel gitie agonya!

Pi nibepoi i kum kite ma Yehova ubodho kogi, ugam ukwayu gibed gicam cam maeno wang’ acel kubang’ oro. Jubed julwong’o nyinge nia Kadhukuwijo.