Moisesajja, ‘janiw mayampsa jutjjäti’ sasaw faraonar säna. Ukatsti janïr sarjjasajj akham sänwa: ‘Chika arumarojja, taqe jilïr wawanakaw Egipto markan jiwapjjani. Faraonan jilïr wawapasa, esclavonakan jilïr wawanakapas jiwapjjarakiniwa’ sasa.

Jehová Diosajj israelitanakar akham sänwa: ‘Mä suma manqʼa wakichasipjjam. Mä marani mä oveja, jan ukajj mä cabrito kharisipjjam. Ukatsti uka wilampiw punkunakamar jawsupjjäta. Uka aycha kankasajj jan levadurani tʼantʼampwa manqʼapjjäta. Sarjjañatakejj listokïpjjañamawa, suma isthaptʼata, wiskhus suma uchtʼata. Jichha arumaw Egiptot salvapjjäma’ sasa. ¿Israelitanakajj kunja kusisitäpjjpachänsa uk amuytati?

Chika arumäjjäna ukhajja, Jehová Diosan angelapaw Egiptonkir taqe utanakar saräna. Kawkïr punkutï wilampi jan jawsutäkäna uka utanjja, jilïr wawanakajj jiwapjjänwa. Ukampis wilampi jawsutäkäna uka utanakanjja, angelajj janiw kunsa jilïr wawanakar lurkänti. Egiptonjja, wali qamiri familianakansa, pobre familianakansa taqeninwa mä wawajj jiwäna. Ukampis israelitanakanjja janiw mä wawas jiwkänti.

Faraonan jilïr wawapas jiwarakïnwa. Faraonajj janiw aguantirjamäjjänti, ukatwa Moisesampir Aaronampir  akham säna: ‘¡Sarjjapjjam! ¡Sarjjapjjam, Diosamar adoranipjjam! ¡Animalanakamsa apasjjapjjam!’ sasa.

Uka arumajj wali phajjsi qhanänwa. Israelitanakajj familianakarjama tribunakarjama suma organizataw Egipto markat sarjjapjjäna. Mä 600.000 chachanakampi, walja warminakampi wawanakampiw sarjjapjjäna. Jan israelitäpkäna ukanakatsa waljaniw Jehová Diosar adorirejj jupanakamp chika sarjjapjjäna. ¡Israelitanakajj librëjjapjjänwa!

Kunjamsa Jehová Diosajj israelitanakar salväna uk amtañatakejja, sapa maraw uka pachpa manqʼa wakichapjjañapäna. Ukajj Pascua sasin uñtʼatänwa.