Nunga didok si Musa tu si Firaun na so olo be nasida pajumpang dohot ibana. Sebelum lao si Musa, didok ibana ma tu si Firaun, ‘Annon tonga borngin, mate ma sude anak siangkangan ni halak Mesir.’

Disuru Jahowa ma asa dibahen bangso Israel sipanganon na asing sian sipanganon nasida na somal. Didok Jahowa ma, ‘Seat ma sada domba manang sada hambing jantan na marumur sataon. Dung i, daishon ma mudarna tu pintu ni jabumuna. Panggang ma jagalna jala pangan ma i dohot roti na so marragi. Pangke ma solopmuna, jala siap-siap ma hamu. Borngin on, hupalua ma hamu.’ Boi do dibayangkon ho songon dia pangkilalaan ni bangso Israel?

Di tonga borngin, ro ma suru-suruan manang malaikat ni Jahowa tu sude jabu ni halak Mesir. Molo ndang adong mudar di pintu ni sada jabu, dibunu ma anak siangkanganna. Alai molo adong mudar di pintu i, dilewati suru-suruan i ma jabu i. Sude do mate anak siangkangan ni halak Mesir. Alai ndang adong na mate anak ni bangso Israel.

Mate do anak siangkangan ni si Firaun. Ala ndang tartaonna be, didok ma tu si Musa dohot tu si Aron,  ‘Lao hamu. Somba hamu ma Debatamuna i. Jala boan hamu ma angka pinahanmuna i!’

Tingki bulan purnama, kaluar ma bangso Israel sian Mesir. Mardalan ma nasida rap dohot keluarga manang dongan samargana be. Adong ma 600.000 baoa ni bangso Israel, jala godang do borua dohot ianakhon ni nasida. Adong do bangso na asing na dohot manomba Jahowa. Ujungna, malua ma bangso Israel!

Ganup taon, sai diallang nasida do sipanganon na sarupa. On gabe parningotan di nasida naung dipalua Jahowa nasida. Digoari ma on, ari Paska.