Moizi seli Faraɔn kɛ ɔ su kɔmɛn i wun lɔ kun. Sanngɛ ka naan w’a wɔ’n, ɔ seli Faraɔn kɛ: ‘Kɔnguɛ afiɛn’n, Ezipti mɛn’n nun’n, ba klikli mun be kwlaa bé wú. Faraɔn bɔbɔ nin i kanga mun be mma klikli mun bé wú wie.’

Zoova seli Izraɛlifuɛ mun kɛ be di aliɛ kun m’ɔ ti i liɛ ngunmin’n. Ɔ seli Be kɛ: ‘Amun kun bua annzɛ boli nga w’a di afuɛ kun’n, yɛ amun fɛ i mmoja’n wie fa klikli amun anuan mun be kadri mun be su. Amun wlɛ nnɛn’n, yɛ amun di nnɛn sɔ’n nin kpanwun mɔ kpanwun ayre nunman nun’n. Amun wlawla amun wun, yɛ amun wla ngbabua kɛ amun su wa kɔ lika sa. Andɛ kɔnguɛ’n, ń dé amun.’ ?Kɛ Izraɛlifuɛ mun be tili ndɛ sɔ’n, ɔ yoli be sɛ?

Kɔnguɛ afiɛn’n, Zoova i anzi’n sinnin awlo mun be nun Ezipti mɛn’n nun. Awlo kwlaa nga i nunfuɛ mun b’a faman mmoja b’a klikliman be anuan’n i kadri’n su’n, be mma klikli mun be wuli. Sanngɛ sua nga mmoja o be su’n anzi’n tu trali be. Eziptifuɛ mun be awlo kwlaa nun’n, i sikafuɛ-o, i yalɛfuɛ-o, ba klikli’n wuli. Sanngɛ Izraɛlifuɛ mun be mma mun be nun wie fi w’a wuman.

Faraɔn i wa klikli’n bɔbɔ wuli wie. Ɔ yoli i ya dan trali su. I sɔ’n ti’n, ɔ seli Moizi nin Aarɔn be kɛ: ‘Amun jaso min mɛn’n nun. Amun wɔ be ko su amun Ɲanmiɛn’n. Amun fa amun nnɛn mun naan amun wɔ.’

 Kɔnguɛ mɔ anglo’n ta kpa’n, Izraɛlifuɛ mun be fin Ezipti mɛn’n nun be fiteli. Kɛ bé kɔ́’n, be awloboawlobo mun nin be akpasuaakpasua mun be lɔngɔ su sɛsɛsɛ. Be nun yasua mun be ti akpiakpi ya nsiɛn (600.000), yɛ bla nin bakanngan mun be sɔnnin kpa wie. Sran kpanngban wie mun ekun be suli be su naan bé kó sú Zoova wie. Siɛn’n, Izraɛlifuɛ mun b’a ɲan be ti.

Kɛ ɔ ko yo naan Izraɛlifuɛ mun be wla w’a kpɛn wafa nga Zoova deli be’n su’n, afuɛ kwlakwla’n be di aliɛ ngunmin kun sɔ’n. Be flɛ i kɛ Delɛ cɛn aliɛ.