Moses i promes long Fero se bambae i no kam luk hem bakegen. Be bifo we hem i aot, hem i talem long Fero se: ‘Long medel naet, evri fasbon pikinini long Ijip bae oli ded, i stat long fasbon boe blong yu, i go kasem fasbon boe blong ol slef.’

Nao Jehova i talem long ol man Isrel blong oli mekem wan spesel kakae, i se: ‘Yufala i kilim i ded wan man sipsip no man nani, we i gat wan yia nomo, mo yufala i ravem blad blong hem long doa. Yufala i rusum mit blong hem, mo yufala i kakae wetem bred we i no gat is long hem. Yufala i putum klos mo sandel, blong yufala i rere blong wokbaot. Long naet ya, bae mi mekem yufala i kamfri.’ !Yu traem tingbaot olsem wanem ol man Isrel oli glad!

Long medel naet, enjel blong Jehova i pas long evri haos long Ijip. Long ol haos we i no gat blad long doa blong olgeta, fasbon i ded. Be enjel i pas ova long ol haos we i gat blad long doa blong olgeta. Evri famle long Ijip i lusum fasbon blong olgeta, nating se oli rij no oli pua. Be i no gat wan pikinini blong ol man Isrel we i ded.

Boe blong Fero tu i ded. Fero i harem se i naf nao. Wantaem nomo, hem i talem long Moses mo Eron se: ‘!Yutufala i aot long ples ya! Yufala i go mekem wosip long God blong yufala. !Mo yufala i tekem ol anamol blong yufala tu!’

 Long naet ya we i gat fulmun, ol famle mo ol laen blong Isrel oli aot long Ijip. I gat 600,000 man wetem plante woman mo pikinini. Mo plante narafala man tu oli aot wetem olgeta, blong oli save go mekem wosip long Jehova. !Ol man Isrel oli fri!

Evri yia, oli mas mekem wan spesel kakae we nem blong hem Pasova, blong tingbaot taem ya we Jehova i sevem olgeta.