Mose dopà na Falo dọ emi ma nasọ tẹnpọn nado wá e dè ba. Amọ́, whẹpo e do tọ́n sọn Falo dè, e dọna ẹn dọ: ‘To zánhomẹ, viplọnji Egipti tọn lẹpo wẹ na kú, yèdọ sọn visunnu Falo tọn ji jẹ visunnu afanumẹ lẹ tọn ji.’

Jehovah dọna Islaelivi lẹ dọ yé ni wleawuna núdùdù vonọtaun de. E dọmọ: ‘Mì hù lẹngbọ kavi gbọgbọẹ asu de he tindo owhe dopo bo mimí ohùn etọn pẹẹde do dòtin ohọ̀n mìtọn lẹ tọn go. Enẹgodo, mì hì olàn lọ bo yí akla madotọ́n do dù i. Mì sọnú bo do afọpa mìtọn lẹ bosọ wleawufo nado yì. Yẹn na tún mì dote to ozán ehe mẹ.’ Be a gán mọ lehe homẹ Islaelivi lẹ tọn na ko hùn do ya?

To zánhomẹ, angẹli Jehovah tọn gbọn owhé lẹpo gbè to Egipti. To owhé he gbè yè ma mimí ohùn do dòtin ohọ̀n tọn lẹ go te, viplọnji lẹpo wẹ kú. Ṣigba, angẹli lọ jo owhé he go yè ko mimí ohùn do lẹ do. Whẹndo Egiptinu lẹpo tọn mẹ wẹ ovi kú te, vlavo yé yin adọkunnọ kavi wamọnọ. Amọ́, ovi dopo tata ma tlẹ kú do Islaelivi lẹ.

Visunnu Falo lọsu tọn tlẹ kú. Falo ma gán sọ doakọnna ba. E dọna Mose po  Aalọn po to afọdopolọji dọmọ: ‘Mì fọ́n. Mì tọ́n sọn fi. Mì yì sẹ̀n Jiwheyẹwhe mìtọn. Mì bẹ kanlin mìtọn lẹ bo yì!’

Islaelivi lẹ dedo sọn Egipti to hinhọ́n osun blebu tọn nù bo yin tito sọgbe hẹ whẹndo po hẹnnu yetọn lẹ po. Sunnu Islaelivi 600 000 wẹ dedo to pọmẹ hẹ yọnnu po ovi susu lẹ po. Mẹsusu devo lẹ sọ hodo yé nado yì sẹ̀n Jehovah hẹ yé. Islaelivi lẹ jẹ yede si lo!

Nado nọ flin lehe Jehovah whlẹn yé gbọn, yé dona nọ dù núdùdù vonọtaun enẹ to whemẹwhemẹ. E nọ yin yiylọdọ Juwayi.