Nagpromisa si Moises sa Paraon nga indi na gid sia magpakita sa iya. Pero antes sia naglakat, nagsiling sia sa Paraon: ‘Sa tungang gab-i, mapatay ang tanan nga subang nga bata sa Egipto, halin sa subang nga bata sang Paraon asta sa subang nga bata sang mga ulipon.’

Ginsilingan ni Jehova ang mga Israelinhon nga maghanda sing espesyal nga pagkaon. Sia nagsiling: ‘Mag-ihaw kamo sing lalaki nga karnero ukon kanding nga isa ka tuig ang edad, kag ipahid ang dugo sini sa inyo mga puertahan. Sugbaha ninyo sa kalayo ang karne kag kaunon ini upod sa tinapay nga wala sing lebadura. Mag-ilis kamo, suksuka ang inyo mga sandalyas, kag magpreparar sa paglakat. Subong nga gab-i, hilwayon ko kamo.’ Maimadyin mo bala ang kalipay sang mga Israelinhon?

Sang tungang gab-i, ginkadtuan sang anghel ni Jehova ang kada balay sa Egipto. Napatay ang subang nga mga bata sa mga balay nga wala sing marka nga dugo sa ila puertahan. Pero ginlaktawan sang anghel ang mga balay nga namarkahan sing dugo. Ang tanan nga pamilya sang mga Egiptohanon, manggaranon man ukon imol, napatyan sang bata. Pero wala gid sing bisan isa nga bata sang mga Israelinhon ang napatay.

 Bisan ang bata nga lalaki sang Paraon napatay. Indi na gid makaagwanta ang Paraon. Gani, ginsilingan niya dayon si Moises kag si Aaron: ‘Lakat na kamo. Maghalin kamo diri. Lakat kamo kag simbaha ang inyo Dios. Dal-a ninyo ang inyo mga sapat kag lakat na kamo!’

Bilog sadto ang bulan sang naglakat paggua sa Egipto ang mga Israelinhon, kag gingrupo sila sa kada pamilya kag tribo. Mga 600,000 ka Israelinhon nga lalaki kag madamo nga babayi kag kabataan ang naglakat. Kag madamo pa nga indi Israelinhon ang nag-upod sa ila para makasimba man kay Jehova. Nahilway na gid man ang mga Israelinhon!

Para madumduman nila ang pagluwas ni Jehova, kada tuig nagahanda sila sing pagkaon nga pareho sa ginhanda nila sadto nga gab-i. Gintawag ini nga Paskua.