EHONGWA 21
Otjiwonga otjitjamurongo
Moses wa kwizikira Farao kutja eye kamaa roro okukondja okumumuna rukwao. Posiya ngunda e hi ya ya, eye wa raera Farao a tja: ‘Mouṱuku mbwi, omuatje auhe otjiveri moEngipte okuza komuzandu waFarao nga kovazandu vovakarere, mave koka.’
Jehova wa raera Ovaisrael kutja ve kare neriro rapeke. Eye wa tja: ‘Zepeye onḓu poo ongombo ondume yombura imwe, nu mu hwe ombinḓu yayo komivero vyozondjuwo zeṋu. Ningiririseye onyama nu mu rye pu nomboroto ndji hi nosure. Rihwikikeye ozombanda nu zareye ozongaku zeṋu mu kare amwe rirongerere okuyenda. Ouṱuku mbwi me mu kutura.’ Ripura uriri kutja Ovaisrael va ri nondjoroka ndji ṱa pi okuzuva omambo ngo!
Mouṱuku mbo, omuengeli waJehova wa ya kondjuwo aihe moEngipte. Mozondjuwo nḓe hari notjiraisiro tjombinḓu pomivero, oviveri vya ṱa. Posiya omuengeli wa kapita pozondjuwo ku kwa hwirwe ombinḓu. Eṱunḓu arihe rOvaengipte ovatumbe novasyona ra zepaisa omuatje. Posiya kape nomuatje wOvaisrael ngwa ṱa.
Nandarire omuzandu waFarao wa ṱa. Farao kaa yenene okutjinda ongaro ndji rukwao. Nu tjimanga otja raera Moses na Aron a tja: ‘Hakahaneye okupita moEngipte. Twendeye mu kerikotamene ku Mukuru weṋu. Tooreye ovinamuinyo vyeṋu mu yende!’
Ovaisrael va pita moEngipte otja komaṱunḓu nomihoko vyawo nu tjandje omueze wa tendama. Pa ri ovarumendu Ovaisrael 600 000 novakazendu ovengi novanatje. Wina pa ri ovandu varwe mba ya pu nOvaisrael kutja ve kerikotamene ku Jehova puna wo. Ovaisrael nambano va kuturwa!
Owo va ri neriro rapeke ombura aihe okuzemburuka omuano Jehova mbwe ve yama. Eriro ndo aari isanewa Opaska.
“MOmatjangwa Ndjambi ma tja kombara yaEngipte: ‘Ami mbe ku zika okurira ombara kokutja mbi raise omasa wandje move, nokutja ena randje ri zuvarisiwe mouye auhe.’”—Ovaroma 9:17
