Moses besemaya enggau Raja menua Ejip iya enda agi datai betemu enggau iya. Tang sebedau iya mupuk, Moses madah ngagai Raja: ‘Ba urung tengah malam, semua anak tuai ti lelaki dalam menua Ejip, belabuh ari anak tuai raja nyentukka anak tuai lelaki bala ulun, deka mati magang.’

Jehovah ngasuh orang Israel nyediaka pemakai ti spesial. Jehovah madah: ‘Bunuh seiku anak domba tauka anak kambin ke beumur setaun, lalu palitka darah jelu nya ba tiang pintu rumah kita. Panggang dagin nya lalu makai enggau roti ti enda beragi. Kita patut begari, lalu ngerasukka selipar, sedia deka mupuk. Malam tu Aku deka ngelepaska kita.’ Ulih nuan ngambarka pengagit ati orang Israel?

Ba tengah malam, melikat Jehovah ngagai tiap iti rumah ba menua Ejip. Ba rumah ke nadai ditanda enggau darah ba tiang pintu, anak lelaki ke tuai mati. Tang melikat nya semina mansa rumah ke bisi ditanda enggau darah. Tiap ruang bilik orang Ejip, enda ngira kaya tauka seranta, lenyau seiku anak. Tang, nadai seiku anak orang Israel mati.

Anak lelaki Raja menua Ejip mega mati. Raja nya enda ulih ngenatka diri agi. Tekala nya, iya ngasuh Moses enggau Aron: ‘Angkat kita ari tu. Angkat kita ari menua aku. Mupuk kita, lalu sembah Petara kita. Bai jelu kita lalu angkat ari tu!’

 Ba malam bulan perenama, orang Israel pansut ari menua Ejip, ditusun nitihka ruang bilik enggau peturun. Bisi 600,000 iku lelaki orang Israel enggau mayuh bala indu sereta anak mit. Pia mega, bisi mayuh orang bukai nitihka sida ngambika ulih nyembah Jehovah. Orang Israel diatu udah dilepaska!

Kena ngingatka chara Jehovah ke udah nyelamatka sida, orang Israel patut nyediaka pemakai spesial nya ninting taun. Pemakai tu dikumbai pengerami Paska.