Musa eerire Firauni atĩ ndangĩacokire kũrĩ we rĩngĩ. No atanathiĩ, eerire Firauni ũũ: ‘Ũmũthĩ ũtukũ marigithathi mothe thĩinĩ wa Misiri kuuma ngombo nginya mũriũ wa Firauni, nĩ megũkua.’

Jehova eerire Aisiraeli mahaarĩrie irio ciarĩ cia mwanya. Aamerire ũũ: ‘Thĩnjai ng’ondu kana mbũri ya mwaka ũmwe na mũcoke mũhake thakame yayo mũrango-inĩ. Hĩhiai nyama ciayo, na mũrĩanĩrie na mũgate ũtarĩ na ndawa ya kũimbia. Ĩkĩrai nguo na iratũ cianyu, mwĩhaarĩrie gũthiĩ tondũ ũtukũ wa ũmũthĩ nĩguo mũkuuma Misiri.’ Ta hũũra mbica ũrĩa Aisiraeli maarĩ na gĩkeno kĩnene!

Mũraika wa Jehova nĩ aathire nyũmba ciothe thĩinĩ wa Misiri ũtukũ ũcio. Marigithathi mothe nĩ maakuire nyũmba-inĩ iria itaarĩ hake thakame mĩrango-inĩ. Mũraika ũcio nĩ aahĩtũkire nyũmba ciothe iria ciarĩ na thakame. Marigithathi mothe thĩinĩ wa Misiri nĩ maakuire, gwa itonga na gwa athĩni. No gũtirĩ mwana o na ũmwe wa Aisiraeli wakuire.

Nginya mũriũ wa Firauni nĩ aakuire. Firauni ndangĩomĩrĩirie rĩngĩ. O hĩndĩ ĩyo eerire Musa na Haruni ũũ: ‘Umai gũkũ! Thiĩi mũgatũngatĩre Ngai wanyu, na mũthiĩ hamwe na nyamũ cianyu!’

 Rĩrĩa Aisiraeli moimire Misiri, kwarĩ na mweri ũtukũ ũcio na maabangĩtwo kũringana na famĩlĩ na mĩhĩrĩga. Aisiraeli arĩa moimire Misiri maarĩ arũme 600,000, atumia aingĩ o hamwe na ciana ciao. Nĩ kwarĩ na andũ angĩ marũmanĩrĩire na Aisiraeli nĩguo magatungatĩre Jehova nao. Rĩu Aisiraeli matiarĩ ũkombo-inĩ rĩngĩ!

Nĩguo maririkane ũrĩa Jehova aamahonokirie, nĩ maagĩrĩirũo kũrĩaga irio icio cia mwanya o mwaka. Na ũndũ ũcio ũgĩtwo Pasaka.