Moses okwa li a lombwela Farao kutya ite ke uya ko vali kuye. Ndele fimbo ina ya, okwa ti: ‘Mokati koufiku, oiveli aishe yOvaegipti otai ka fya, okudja koshiveli shaFarao fiyo okoiveli yovapika.’

Jehova okwa li a lombwela Ovaisrael va lye ouvalelo we likalekelwa. Okwa ti: ‘Dipaeni okadjona ile okakombwena komudo umwe, nokuvaeka ohonde yako imwe kominghulo domivelo. Yofeni ombelela, noku i lya pamwe nomingome dihe na onhafi. Kaleni mwa djala oikutu neenghaku, mwe lilongekida okuya. Oufiku ou ohandi ke mu mangulula.’ Ovaisrael kava li tuu va hafa!

Mokati koufiku, omweengeli waJehova okwa li a ya eumbo neumbo muEgipti. Oiveli yomomaumbo oo a li inaa didilikwa nohonde kominghulo domivelo oya fya. Ndele omweengeli okwa li a pitilila eumbo keshe olo la li la vaekwa nohonde. Keshe eumbo muEgipti, kutya nee oloshipuna ile olomufyoona, omwa li mwa fya okaana. Ashike ounona vOvaisrael ova li va xupa.

Oshiveli shaFarao nasho osha fya. Farao ka li vali ta dulu okulididimikila onghalo oyo, nomolwaasho okwa li a lombwela diva Moses naAron ta ti: ‘Indeni, djeni mo moshilongo shange mu ka longele Kalunga keni. Kufeni yo oimuna yeni ndele tamu i.’

Ovaisrael ova li va dja mo muEgipti oufiku, va li va unganekwa pamaukwaneumbo nosho yo pamapata. Ovalumenhu ova li 600 000 nosho yo ovakulukadi nounona vahapu.  Natango, ova li va ya pamwe nOvaegipti vamwe opo navo va ka longele Jehova. Kungaho, Ovaisrael ova li va mangululwa.

Opo va dimbuluke nghee Jehova a li e va xupifa, ova li ve na okulya ouvalelo we likalekelwa omudo keshe, hau ifanwa Opaasa.