Mozé ua kanena kua Falaó kuila keji vutuka dingi phala kudisanga-nê. Maji ande dia kutunda, muene ua tangela Falaó: ‘Mu kaxi ka usuku, tuana tuoso tua dianga tua akua Ijitu, tundé ku mona ua Falaó katé ku ana abhika, a-nda fua.’

Jihova ua tangela akua Izalaiele phala kulamba kudia kua katunda. Muene uambe: ‘Jibhenu kambudi mba kahombo kala ni muvu umoxi, mu kuata o manhinga anga mua ta ku thandu’a mielu. Muoha o xitu anga mu i dia ni jimbolo ja kambe felemendu. Mu zuata, mu ta o jihai jenu, mu kala polondo phala kuia. Usuku ua lelu, nga-nda mi bhulula.’ U tena kuxinganeka o kisangusangu kia kexile na-kiu akua Izalaiele?

Mu kaxi ka usuku o anju ia Jihova, ia bhiti mu jinzo joso ja akua Ijitu. O jinzo ki mu kexile manhinga, ku thandu’a mielu, o tuana tuoso tua dianga tuafu. Maji o anju ia somboka o jinzo kua kexile o manhinga. O miji ioso ia akua Ijitu, a fundu tuana kixi o jimvuama mba o jingadiama. Maji ku tuana tua akua Izalaiele, ki kufu né ngó mona umoxi.

Katé muene ni mon’â Falaó, a mu jibha. Falaó ka tenene dingi ku dibhana ni maka oso iá mu kithangana kienhókio. Ni lusolo-luoso muene uambela Mozé ni Alá uixi: ‘Tundenu. Tundenu bhabha.  Ndenu mu bheze o Nzambi ienu. Ambatenu o iama ienu ioso ngi tundilienu bhabha!’

Mu mbeji ia thethama, o ana Izalaiele a tundu mu ixi ia Ijitu, mu ibuka-ibuka, miji ni miji. Akua Izalaiele exile 600.000, mala, ahatu ni ana-ndenge. Athu avulu kexile akua Izalaiele, ai kumoxi phala kubheza ue Jihova. Mu kithangana kienhókio akua Izalaiele a a bhulula ku ubhika!

Ene a bhangele o fesa íii ia katunda muvu ni muvu phala kulembalala kiebhi Jihova kia a bhulula. A i xanene Phasu.