Mozis bin prɔmis Fɛro se dɛn nɔ go si igen. Bɔt bifo i go, i bin tɛl Fɛro se: ‘Midulnɛt, ɔl di fɔs pikin dɛn na Ijipt, frɔm Fɛro in bɔypikin to in slev dɛn bɔypikin dɛn ɔl go day.’

Jiova bin tɛl di Izrɛlayt dɛn fɔ mek wan spɛshal it. I tɛl dɛn se: ‘Una kil wan man ship ɔ got we ol wan ia, ɛn una rɔb sɔm pan in blɔd na una domɔt dɛn. Una ros di bif, ɛn una it am wit bred we nɔ gɛt yist. Una drɛs, wɛr una sandal dɛn, ɛn rɛdi fɔ go. A go fri una dis nɛt.’ Yu ebul tink bɔt aw dis go dɔn mek di Izrɛlayt dɛn rili gladi?

Midulnɛt, Jiova in enjɛl bin go na ɔl di os dɛn na Ijipt. Ɔl di fɔs pikin dɛn bin day na di os dɛn we dɛn nɔ bin rɔb blɔd na dɛn domɔt. Bɔt di enjɛl bin pas di os dɛn we dɛn bin mak wit blɔd. Ɔl di Ijipshian dɛn famili dɛn, di wan dɛn we jɛntri ɛn di wan dɛn we po, bin lɔs dɛn pikin dɛn. Bɔt di Izrɛlayt dɛn pikin dɛn nɔ bin day.

Ivin Fɛro in yon bɔypikin bin day. Fɛro nɔ bin ebul fɔ bia dis igen. Wantɛm wantɛm, i bin tɛl Mozis ɛn Erɔn se: ‘Una grap. Una kɔmɔt na ya. Una go wɔship una Gɔd. Una tek una animal dɛn ɛn go!’

 Di Izrɛlayt dɛn bin waka kɔmɔt na Ijipt bay famili ɛn trayb we di mun bin de shayn. Na bin 600,000 Izrɛlayt man dɛn, ɛn bɔku uman ɛn pikin dɛn. Dɔn bak, bɔku ɔda pipul dɛn bin go wit dɛn so dat dɛnsɛf go wɔship Jiova. Faynali, di Izrɛlayt dɛn bin fri!

Di Izrɛlayt dɛn bin de mek dis sem spɛshal it ɛni ia fɔ mɛmba aw Jiova bin sev dɛn. Dɛn bin de kɔl am di Pasova.