တၢ်မၤလိ ၂၁
တၢ်နးတၢ်ဖှီၣ်လၢခံကတၢၢ်တခါ
စီၤမိၤၡ့အၢၣ်လီၤဝဲစီၤပၤဖၤရိၤလၢ အတဟဲထံၣ်လိာ်အသးဒီးအီၤလၢၤဘၣ်. ဘၣ်ဆၣ် တချုးလၢစီၤမိၤၡ့ဟးထီၣ်ကွံာ်န့ၣ် အဝဲတဲဘၣ်စီၤပၤဖၤရိၤလၢ– ‘ဖဲဖးဖီမုၢ်န့ၣ် ကယဲၢ်ပှၤအဲၤကူပတူးအဖိဝဲၢ်ကိ စးထီၣ်လၢစီၤပၤဖၤရိၤအဖိဝဲၢ်ကိ တုၤလီၤလၢအကုၢ်အဖိဝဲၢ်ကိန့ၣ် ကသံဝဲခဲလၢာ်လီၤ.’
ယဟိဝၤယွၤတဲဘၣ် ပှၤအံၣ်စရ့လးဖိတဖၣ်လၢ အဝဲသ့ၣ်ကဘၣ်မၤဝဲတၢ်အီၣ်လီၤဆီတခါလီၤ. ကစၢ်ယွၤတဲဘၣ်အဝဲသ့ၣ်လၢ– ‘မၤသံသိ မ့တမ့ၢ် မဲာ်တဲးလဲးလၢအသးအိၣ်တနံၣ် ဒီးအသွံၣ်န့ၣ် ဖှူအီၤလၢကျဲစၢၤအခိၣ်ထိးတက့ၢ်. မ့မ့ၢ်အညၣ်န့ၣ် ကၣ်မံအီၤ, ဝံၤဒီးအီၣ်အီၤဃုာ်ဒီးကိၣ်လၢ တပၣ်ဃုာ်ဒီးကိၣ်မံၣ်တက့ၢ်. ဒီးကူထီၣ်သိးထီၣ်ပာ်စၢၤသုကူသုကၤ, ဒိးထီၣ်ပာ်စၢၤသုခီၣ်ဖံး ဒီးအိၣ်ကတဲာ်ကတီၤထီၣ်ပာ်စၢၤသုသးလၢ သုကဟးထီၣ်အဂီၢ်တက့ၢ်. တနၤအံၤ ယကမၤပူၤဖျဲးသုလီၤ.’ ပှၤအံၣ်စရ့လးဖိတဖၣ် ကသးခုဝဲထဲလဲၣ်န့ၣ် နဆိကမိၣ်ကွၢ်သ့ဝဲလီၤ.
ဖဲဖးဖီမုၢ်အဆၢကတီၢ်န့ၣ် ယဟိဝၤယွၤအမူခိၣ်ကလူး လဲၤဝဲဆူကယဲၢ်ဟံၣ်လၢအအိၣ်လၢ ကီၢ်အဲၤကူပတူးအပူၤကိးဖျၢၣ်ဒဲးလီၤ. ဟံၣ်လၢအကျဲစၢၤမ့ၢ်တဖှူအသးဒီးတၢ်သွံၣ်န့ၣ် အဖိခွါဝဲၢ်ကိဘၣ်တၢ်မၤသံအီၤလီၤ. ဘၣ်ဆၣ် ဟံၣ်လၢအကျဲစၢၤအိၣ်ဒီးတၢ်သွံၣ်န့ၣ် မူခိၣ်ကလူးလဲၤကပာ်ကွံာ်ဝဲလီၤ. ကယဲၢ်ပှၤအဲၤကူပတူးဖိလၢ အကဲဒိၣ်မ့ၢ်ဂ့ၤ အဖှီၣ်မ့ၢ်ဂ့ၤ အဖိဝဲၢ်ကိန့ၣ် ဘၣ်တၢ်မၤသံကွံာ်ဝဲခဲလၢာ်လီၤ. မ့မ့ၢ်ပှၤအံၣ်စရ့လးအဖိဝဲၢ်ကိန့ၣ် တသံဝဲနီတဂၤဘၣ်.
စီၤပၤဖၤရိၤအဖိဝဲၢ်ကိ ဒၣ်လဲာ်သံဝဲအဃိ အဝဲတူၢ်ဝဲ တပှဲၤလၢၤဘၣ်. အဃိ တဘျီဃီန့ၣ်အဝဲတဲဘၣ်စီၤမိၤၡ့ဒီး စီၤအၤဟရိၣ်လၢ– ‘ဂဲၤဆၢထၢၣ်, ဟးထီၣ်ကွံာ်လၢ ယပှၤဂီၢ်မုၢ်အကျါ, ကိးထီၣ်သုဆၣ်ဖိကီၢ်ဖိဒီး လဲၤဘူၣ်ထီၣ်ဘါထီၣ်သုယွၤတက့ၢ်.’
ဖဲလါပှဲၤအနၤအံၤ ပှၤအံၣ်စရ့လးဖိတဖၣ် ဟးထီၣ်ကွံာ်လၢကီၢ်အဲၤကူပတူးအပူၤ တဒူၣ်ဘၣ်တဒူၣ်လီၤ. ပှၤအံၣ်စရ့လးဖိလၢ အဟးထီၣ်ကွံာ်န့ၣ် ပၣ်ဃုာ်ဒီးဖိဒံဖိသၣ်တဖၣ်, ပိာ်မုၣ်တဖၣ် ဒီးပိာ်ခွါတဖၣ်လီၤ. ထဲပှၤပိာ်ခွါတဖၣ်န့ၣ် အနီၣ်ဂံၢ်အိၣ်ဝဲ ၆၀၀,၀၀၀ လီၤ. တကးဒံးဘၣ် ပှၤအါဂၤလၢအတမ့ၢ်ပှၤအံၣ်စရ့လးဖိတဖၣ်န့ၣ် လဲၤပိာ်ဝဲပှၤအံၣ်စရ့လးဖိအခံ ဒ်သိးကလဲၤဘူၣ်ထီၣ်ဘါထီၣ်ဝဲ ယဟိဝၤယွၤအဂီၢ်လီၤ. ပှၤအံၣ်စရ့လးဖိတဖၣ်န့ၣ် ပူၤဖျဲးထီၣ်ဝဲလၢကုၢ်အလီၢ်လံ.
ပှၤအံၣ်စရ့လးဖိတဖၣ်မၤဝဲ တၢ်အီၣ်လီၤဆီတခါအံၤတနံၣ်တဘျီ ဒ်သိးကသ့ၣ်နီၣ်ထီၣ်က့ၤဝဲလၢ ယဟိဝၤယွၤမၤပူၤဖျဲးအဝဲသ့ၣ်လၢ ကုၢ်အလီၢ်လီၤ. တၢ်အီၣ်လီၤဆီလၢ ပှၤအံၣ်စရ့လးဖိမၤဝဲအံၤန့ၣ် အဝဲသ့ၣ်ကိးဝဲလၢ ဘူၣ်လဲၤကပာ်လီၤ.
“လၢတၢ်အံၤ တမံၤဒၣ်လဲာ်အဃိ, ယဒုးအိၣ်ထီၣ်နၤ ဒ်သိးယကဒုးနဲၣ် ယစိယကမီၤလၢနၤ, ဒီးဒ်သိး ယကဒုးဟူထီသါလီၤ ယမံၤလၢ ဟီၣ်ခိၣ်ဒီဘ့ၣ်ညါ န့ၣ်လီၤ.”—ရိမ့ၤ ၉:၁၇