Mose wasia nsilu kwa Faro vo ke kwenda diaka mokena yandi ko. Kansi, vitila kavaika, wavovesa Faro vo: ‘Muna dingidingi, o wan’antete awonso a esi Engipito, tuka mwan’antete a Faro yo wan’antete a ntaudi fwa befwa.’

Yave wavovesa Aneyisaele vo bavanga nkinzi. Wabavovesa vo: ‘Nuvonda mwan’a meme yovo nkombo, koko dia mvu mosi yo kusa menga mandi muna mielo mieno. ‘Nuyanga e mbizi yo dia yo kumosi ye mbolo ke zafuna ko. Nuvuata yo sia nsampatu zeno, nwakala nwakubama mu kwenda. Omu fuku wau ikunuvevola.’ Nga olenda yindula e kiese bamona Aneyisaele?

Muna dingidingi, mbasi a Yave waviokela muna nzo zawonso za esi Engipito. E nzo ina ke yakala ye menga ko muna mwelo, o mbasi wavondanga mwan’antete. Kansi, waviokanga e nzo zakala ye menga muna mwelo. Esi Engipito awonso, kiakala mvuama yovo nsukami, bafwilwa mwan’antete. Kansi, ke mosi ko muna Aneyisaele wafwilwa mwana.

Kana nkutu mwan’a Faro wafwa. Faro kalenda dio kakidila ko. Vana vau, wavovesa Mose yo Arone vo:  ‘Nutelama. Nukatuka mu nsi yayi. Nuenda sambila Nzambi eno. Nubonga bulu yeno nwavaika.’

Kuna nsi a miezi mia ngonde, Aneyisaele bavaika muna Engipito, bavambaneswa mu buka kia nzo ye makanda. Tezo kia 600.000 ma Aneyisaele bakala. Akala, akento yo wana. Ulolo wa wantu mpe bayenda yau entwadi kimana basambila Yave. Aneyisaele bavevolwa!

Muna sungamena una Yave kabavuluzila, diavavanga vo bavanganga nkinzi wauna konso mvu. O nkinzi wau wayikilwanga vo Nduta.