Mose alwezele Fwalo ngwenyi keshi kukamumona chekako. Oloze shimbu kanda ayenga, Mose alwezele Fwalo ngwenyi: ‘Vana vavatwatwa vosena vamuEjipitu navafwa naufuku, kuputukila kuli mwanaFwalo walunga watwatwa nakuli vana vavatwatwa vavandungo.’

Yehova alwezele vaIsalele vawahise kulya chakulipwila. Avalwezele cheka ngwenyi: ‘Jihenu pembe chipwe mukoko wamwaka umwe nakushila manyinga havipamba vyavikolo vyenu. Ochenu nyama nakulya nambolo yakuzeneka chimbalwila. Mukavwale mendelo kumahinji enu nakulizanga kuya. Ufuku walelo nangumisokola.’ Achishinganyeke hakuwaha vevwile vaIsalele hakuvasokola muundungo.

Mukachi kaufuku, kangelo kaYehova ayile kuzuvo hizuvo yamulifuchi lyaEjipitu. Kujizuvo kuze kavashilile manyinga havipamba vyavikoloko, vana vavatwatwa vamalunga vosena vafwile. Oloze kujizuvo kuze vashilile manyinga, kangelo kajihile vana vavatwatwa vamalungako. Jitanga josena javaEjipitu jafwishile vatwatwa vamalunga. Oloze kakwapwile mwana watwatwa walunga muli vaIsalele uze afwileko.

Ngocho namwanaFwalo walunga afwile. Echi chalingishile jino Fwalo etavile kusuula vaIsalele. Kaha alwezele Mose naAlone ngwenyi: ‘Katukenu. Fumenu kumeso ami. Yenu nakulemesa Kalunga kenu. Mbatenu vimuna jenu muyenga.’

 Ufuku vene uze, vaIsalele vafumine muEjipitu kweseka najitanga javo namiyachi yavo. Malunga vavaIsalele 600,000 namapwevo vavavulu navana valovokele. Navatu vamwe vaze kavapwile vaIsaleleko navakiko vayile mangana vakalemese Yehova. Chikupu vene vaIsalele vavasokwele jino muundungo.

Hakusaka mangana vanukenga omu Yehova avasokwele, vaIsalele valingilenga chiwanyino chakulipwila mwaka himwaka chize vavulukilenga ngwavo Paseka.