ကျွန်တော် နောက်​တစ်ခေါက် မလာ​တော့​ပါဘူး​လို့ ဖာရော​ကို မောရှေ ကတိပေး​လိုက်တယ်။ ဒါပေမဲ့ မထွက်သွားခင်​မှာ ဖာရော​ကို ‘ညသန်းခေါင်​ကျ​ရင် အီဂျစ်ပြည်​က ဖာရော​ရဲ့​သားဦး​အပါအဝင် ကျွန်​အားလုံး​ရဲ့ သားဦး​မှန်သမျှ သေ​ရ​လိမ့်မယ်’ လို့ပြောတယ်။

ယေဟောဝါက အစ္စရေး​တွေကို အထူးည​စာ​စား​ဖို့ အခုလို​ပြောတယ်– ‘တစ်နှစ်သား သိုးတစ်ကောင် ဒါမှမဟုတ် ဆိတ်​တစ်ကောင်​ကို သတ်​ပြီး သွေး​ကို တံခါးထုပ်​နဲ့ တံခါး​တိုင်​မှာ သုတ်​ပါ။ အသား​ကို မီး​ကင်​ပြီး တဆေးမဲ့​မုန့်​နဲ့ စား​ပါ။ အဆင်သင့် ထွက်သွား​နိုင်​ဖို့ အဝတ်အစား​တွေ ဝတ်​ပြီး ဖိနပ်​တွေ စီး​ထားပါ။ ဒီ​ညမှာ မင်း​တို့​ကို လွတ်မြောက်​စေမယ်။’ အစ္စရေးတွေ စိတ်လှုပ်ရှား​နေကြ​မှာပဲ။

ညသန်းခေါင်​ရောက်တဲ့​အခါ ယေဟောဝါရဲ့ ကောင်းကင်တမန်​ဟာ အီဂျစ်ပြည်​မှာရှိတဲ့ အိမ်တိုင်း​ဆီကို သွားတယ်။ သွေး​မ​သုတ်​ထားတဲ့ အိမ်တွေထဲက သားဦး​မှန်သမျှ သေ​ကုန်​တ​ယ်။ သွေးသုတ်​ထားတဲ့ အိမ်တွေကို ကောင်းကင်တမန် ကျော်သွား​တ​ယ်။ အီဂျစ်ပြည်​က ဆင်းရဲ​တဲ့​မိသားစုမှာ​ရော ချမ်းသာ​တဲ့​မိသားစုမှာပါ​ရှိတဲ့ သားဦး​တွေ သေ​ကုန်​တ​ယ်။ အစ္စရေး​တွေရဲ့ သားဦးတစ်ယောက်​မှ မသေ​ဘူး။

ဖာရော​ရဲ့ သားဦး​တောင် သေသွား​တ​ယ်။ ဖာရော အရှုံးပေး လိုက်ရ​တော့​တ​ယ်။ မောရှေ​နဲ့ အာရုန်​ကို ည​တွင်း​ချင်း ခေါ်​ပြီး ‘ထွက်သွား​ကြ​တော့။ မင်း​တို့ ဘုရားကို သွား​ဝတ်ပြု​ကြ၊ မင်း​တို့​တိရစ္ဆာန်တွေ​ပါ ယူသွား​ကြ’ လို့ပြောတယ်။

 လ​ပြည့်​ညမှာ အစ္စရေး​တွေဟာ မိသားစု​လိုက်၊ မျိုးနွယ်​လိုက် စနစ်တကျ အီဂျစ်ပြည်ကနေ ထွက်​လာကြတယ်။ အစ္စရေး​ယောက်ျား​ချည်း​ပဲ ၆၀​၀,၀​၀​၀ နဲ့ မိန်းမ​တွေ၊ ကလေးတွေ​ပါ ပါသွား​တ​ယ်။ တခြားသူ အများကြီး​လည်း ယေဟောဝါကို ဝတ်ပြု​ဖို့ သူတို့နဲ့အတူ လိုက်​သွားတယ်။ နောက်ဆုံး​တော့ အစ္စရေးတွေ လွတ်မြောက်​သွား​ပြီ။

ယေဟောဝါ သူတို့ကို ဘယ်လို ကယ်တင်​ခဲ့တယ်​ဆိုတာ သတိရ​ဖို့ နှစ်​တိုင်း အဲဒီ​အထူးညစာစားပွဲ​ကို ကျင်းပ​ရမှာ​ဖြစ်တယ်။ အဲဒီ​ပွဲ​ကို ပသခါပွဲ​လို့ ခေါ်တယ်။