Moisés kiiljuik faraón ayokmo yaskia kiitati, uan kema nechka yaskia kiiljuik: “Tlajkoyoual, mikisej nochi ininachtouikoneuaj egiptoeuanij, mikis moachtouikone uan nojkia ininachtouikoneuaj motekipanojkauaj”.

Jehová kiniljuik israeleuanij ma kichiuakaj se tlakualistli tlen amo kema kichijtoyaj, kiniljuik: “Xijmiktikaj se pilborregojtsi o se pilchivojtsi tlen kipia se xiuitl, uan ieso xijpolokaj ipan kaltenkuauitl. Nopa nakatl san xijkakatsokaj uan xijkuakaj ika pantsi tlen amo kipia tlasonejkayotl. Moneki inmokualchijchijtosej, inmoyoyontijtosej uan inmotlalilijtosej inmotekak. Ni youali niinmechmakixtis”. ¡Israeleuanij tlauel yolpaktoyaj!

Tlajkoyoual, Jehová iiluikaejka panotiajki ipan sejse kali. Kampa amo kiesjuijtoyaj nopa kaltenkuauitl, mijki nopa achtouiejketl. Uan kampa kiesjuijtoyaj nopa kaltenkuauitl, amo tleno kipanok nopa achtouiejketl. Nochi ininachtouikoneuaj egiptoeuanij mijkej; katli tlatominpixtoyaj uan katli teikneltsitsij. Uan ininkoneuaj israeleuanij amo tleno kinpanok.

Iachtouikone faraón nojkia mijki. Faraón tlauel moyolkokok uan kiniljuik Moisés uan Aarón: “¡Ya xiakaj! ¡Xiakaj xijueyichiuatij inmoTeotsij! ¡Xikinuikakaj inmotlapialjuaj!”.

 Ipan nopa youali kema israeleuanij kistejkej, temitoya metstli. Sansejko nejnentiajkej ininuaya ininchampoyouaj. Kistejkej 600,000 tlakamej, uan miakej siuamej uan konemej. Miakej katli amo eliyayaj israeleuanij nojkia yajkej kiueyichiuatoj Jehová. ¡Jehová kinmakixtik israeleuanij!

Sejse xiuitl kichiuaskiaj nopa tlakualistli, kiampa kiilnamikiskiaj kenijkatsa Jehová kinmakixtijtoya. Tlen kichiuaskiaj kitokaxtijkej Pascua.