Mosi wakamugondesa kuti aacaizoviya komuvona. Asi acito apinda, iyena wakati kuna Faro: ‘Pakati po usiku huno, vana vese vo dangwe mu Ejipita, kubvira ngo mwana wa Faro mbhera ku vana vo varanda, vese vanozofa.’

Jehovha wakabvunja vaIziraeri kuti vave no zvokuha zvinosisira. Iyena wakati: ‘Urayanyi bvuta ro rume kana gotokoto zve modira padoko ngazi pa musuvo jenyu. Mokoca zvo kuha izvi zve moha pamwepo no pau icizivi kudiwa zviro.zvinokukumuja. Mogara makanasirira, mosimira nguvo jenyu, no magwada enyu. Usiku huno ndinozomusujunura.’ Ungakwanisa kurangarira kuti madakarironyi akava no vaIziraeri?

Pakati po usiku, ngirozi ya Jehovha yakanghwina mu nyumba jese jo vaEjipita. Mu nyumba jicaingepi no ngazi pa musuvo, mwana wese wo dangwe waifa. Asi ngirozi yaipindirija nyumba jese jaimakwa ngo ngazi. Mbhuri jese jo vaEjipita, vakhupuki no varombo, vakaruza vana vavo. Asi apana no mwana umwe wo vaIziraeri wakafa.

Pikija mwana wa Faro wainga wafa, Faro aazivi kukwanisa kuita ciri cese. Ngo kukasika iyena wakati kuna Mosi na  Aroni: ‘Mukanyi. Budanyi pano. Endanyi zve namatanyi Mwari wenyu. Toranyi zvinyama zvenyu zve endanyi!’

Mweji pawainga wakazara, vaIziraeri vakafamba vecibuda muEjipita, vairongwa ngo mbhuri no majinja. Painga pano 600.000 zvo vanarume no vanakaji vazinji no vana. Paingavo no vandhu vamweni vaingavo pamwepo navo kuti vakwanise kunamatavo Jehovha. Pakupera ko zvese vaIziraeri vainga vasujunuka!

Kuti vaceukije maponesehwe avakaithwa ndi Jehovha, ivona vaizova no kuha kondhoko gore ngo gore. Kwakazodanijwa Phasika.