Moses oku uvanekele Farao kutya ite ke mu mona we nandonando. Manga inaa ya, okwa lombwele Farao a ti: ‘Mokati kuusiku, okanona kehe okasheeli kokamati muEgipiti oke na okusa, okuza ngaa kosheeli shoye sigo okosheeli shomupika.’

Jehova okwa lombwele Aaisraeli ya ninge uulalelo wowina. Okwa ti: ‘Dhipageni onzi ondumentu nenge oshikombo shomumvo gumwe, e tamu gwayeke ombinzi yasho kiikulo yomiyelo dheni. Onyama yi yotheni e tamu yi li niikwiila inaayi tulwa efulika. Kaleni mwa zala oongaku, mwi ilongekidhila olweendo. Uusiku mbuka, otandi ke mu mangulula.’ Mbela Aaisraeli kaya li ya nyanyukwa?

Pokati kuusiku, omuyengeli gwaJehova okwe ende omagumbo agehe muEgipiti. Egumbo kehe inaali gwayekwa ombinzi kiikulo yomiyelo, osheeli shamo oshi na okusa. Omuyengeli okwa pitilile pomagumbo agehe ngoka ga gwayekwa ombinzi pomiyelo. Aanegumbo ayehe Aaegipiti aayamba noohepele, uunona wawo uusheeli owa dhipagwa, ihe wAaisraeli inawu dhipagwa.

Osheeli shaFarao nasho osha dhipagwa. Shoka Farao ka li we ta vulu oku shi idhidhimikila. Mbalambala okwa lombwele Moses naAaron a ti: ‘Indeni, zii po mpaka. Ka longeleni Kalunga keni. Indeni niimuna yeni!’

 Aaisraeli oya zi muEgipiti sho omwedhi gwa li gwa toka, yu unganekwa momazimo nomomaukwanegumbo. Opwa li aalumentu Aaisraeli 600 000 naakulukadhi naanona oyendji. Opwa li wo aantu yalwe oyendji mboka ya yi pamwe nayo, opo nayo ya ka longele Jehova. Hugunina Aaisraeli osho ya manguluka.

Opo ya dhimbulukwe nkene Jehova e ya hupitha, omumvo kehe oya li haya kala ye na uulalelo mboka wowina. Uulalelo mboka owa li hawu ithanwa Opaasa.