Fazazi Moze khö Waraʼo wa lö saʼae ifuli ifalukhaisi ia. Fatua lö mofanö ia imane, ’Ba zi talu mbongi dania, mate fefu nono matua siaʼa ba Miserai, iʼotarai khö nono Waraʼo ofeta ba nono zi möi sawuyu.’

Iʼandrö Yehowa ba ndraono Gizaraʼeli enaʼö larino gö si faböʼö moroi ba zi toʼölönia. Imane, ’Taba sageu mbiri-biri mazui nambi si matua ba si döfi faʼebua. Mifagule ndronia ba mbawandruhö khömi. Mifaga nagolenia, ba miʼa awö roti si lö mufaruka ragi. Mifaʼanö ami ba mifake zandralami. Bongi daʼa uʼefasi ami.’ Khalaigö hawaʼomuso dödö ndraono Gizaraʼeli!

Ba zi talu mbongi, tohare malaʼika Yehowa itöröi fefu nomo ba Miserai. Na lö hadöi do ba mbawandruhö nomo andrö, ibunu nono matua siaʼa ba nomo daʼö. Hizaʼi na so ndro, lö ifalua daʼö. Ahori mate fefu nono siaʼa ba niha Miserai, he si kayo hegöi si numana. Hizaʼi, lö hadöi ono niha Gizaraʼeli si mate.

Mate göi nono matua siaʼa khö Waraʼo. Tebai saʼae itaha Faraʼo. Imane khö Moze faoma Aʼaroni, ’Miʼofanö ba daʼa. Mifosumange Lowalangimi. Miʼohe fefu gurifömi!’

 Me baŵa desaʼa, aheta ndraono Gizaraʼeli moroi ba danö Miserai. Laföfögö ira moloʼö sambua-sambua omo hegöi mado zamösana. So 600.000 ndra matua Gizaraʼeli, ba ato ndra alawe hegöi iraono. Baero daʼö, so niha moroi ba soi böʼö zi fao ba wamosumange Yehowa. Ba gafuriatania, aefa ndraono Gizaraʼeli!

Ero röfi, laʼa gö si tohude moroi ba zi toʼölö simane niʼara me luo daʼö enaʼö lö olifu ira wa Yehowa zangefaʼö yaʼira. Inötö wemanga andrö lafotöi ia Fasa.