Mózes éí Féro doo nínáádeeshdáał da yidííniid. Ndi Mózes éí Féro tʼah doo bitsʼą́ąjįʼ dashdiighááhgóó, kóbizhdííniid: ‘Tłʼéʼííłníiʼgo Ííjip dineʼé alą́ąjįʼ nidahaazhchíinii, Féro biyeʼ bee hahoolʼáádóó naalteʼ dabiyeʼ bee nihoolʼáajįʼ ałtso dadínóonééł.’

Jiihóvah éí Ízrel dineʼé kótʼéego chʼiyáán ádadoołííł áádóó dadoohsı̨́ı̨́ł yidííniid. Jiihóvah ádííniid: ‘Dibé yázhí bikąʼii doodaiiʼ tłʼízí łaʼ binááhaí deidiyoołhééł, áádóó bidił nihichʼéʼétiingi ałtsʼą́ą́hjí áádóó naadasitánígíí bee dadoohdlish. Atsįʼígíí tsííkááʼ dadoołtʼis, áádóó dííkʼǫsh tʼáágééd bááh ályaago bił dadoohsı̨́ı̨́ł. Dah didoonééł biniyé hashtʼeʼádadidoołnííł índa tʼáá nikeeʼ nisooʼeez doo. Díí bitłʼééʼ éí chʼéénihideeshʼish.’ Ízrel dineʼé ayóó átʼéego bił dahóózhǫǫd!

Tłʼéʼííłníiʼgo Ííjipgi Jiihóvah bá naalʼaʼí łaʼ dahooghangóó hadiiyá. Éí chʼéʼétiingi ałtsʼą́ą́hjí áádóó naadasitánígíí dił doo bee daashdlézhí góneʼ alą́ąjįʼ daazhchíinii yę́ę daneezná. Ndi chʼéʼétiingi ałtsʼą́ą́hjí áádóó naadasitánígíí dił bee daashdléézh yę́ęgóó éí yitis deeyá. Tʼáá ałtso Ííjip dineʼé beʼawééʼ alą́ąjįʼ nidahaazhchíinii bitsʼąą daneezná. Ndi Ízrel dineʼé éí beʼawééʼ tʼáadoo ndi łaʼ daaztsą́ą da.

 Féro biyeʼ atah daaztsą́. Áko Féro éí kʼadí yeeʼ niizı̨́ı̨́ʼ. Áádóó tʼáá ákǫ́ǫ́ Mózes dóó Éran ííłní: ‘Nihílááh, níwohjįʼ wohnééł. NihiDiyin bichʼįʼ nidahohłá. Nihilı̨́ı̨́ʼ tʼáá ałtso bił wohnééł!’

Ooljééʼ hanííbą́ązgo, tʼáá łaʼ dah oonéłígíí bikʼehgo nizhónígo Ízrel dineʼé Ííjipdę́ę́ʼ chʼíníná. Hastóí danílínígíí éí 600,000 ánéelą́ą́ʼ, áádóó sáanii dóó áłchíní éí ląʼí. Náá ałdóʼ łahdę́ę́ʼ dadineʼé bił chʼízhníná, áko bí ałdóʼ atah Jiihóvah yichʼįʼ dahodísin doo biniyé ádaatʼı̨́. Índída Ízrel dineʼé hwééʼílniiʼ!

Jiihóvah yisdáhóónilgi béédajilniih doo biniyé, Atisʼadeesdzá doodaiiʼ Passover wolyéego tʼáá nináháhááh bikʼeh nídajiiłʼaah doogo há niiníʼą́.