Moisesi apopila Farao okuti himakondoka vali. Mahi nkhele tyina eheneende apopila vali Farao okuti: ‘Tyina tyihika mokati kovinthiki ovana aveho oviveli mo Egitu mavankhi okuhimbikila komona wa Farao alo ko kovana vo vapika.’

Jeova apopila ova Isilayeli opo vateleke okulia kuelikalela motyinthiki otyo. Ati: ‘Ipaei otyiketa tyo ongi ine tyo tyinkhombo tyina enima like ohonde yatyo amuilombo po nombundi mbonondyuo mbenyi. Yokei ohitu yatyo amuli no nombolo mba yokwa mbehena onkhiso. Pongiyei omuvalo wenyi nononkhaku mbenyi opo muende. Motyinthiki tyino mandyimupolo mo Egitu.’ Upondola okusoka kehambu ova Isilayeli vakala nalio etyi veiva ondaka ya Jeova?

Mokati kovinthiki oandyu ya Jeova ailambela po nondyuo ambuho mo Egitu. Pomapito onondyuo mbahalombelwe ohonde oviveli aviho avinkhi. Mahi oandyu aihanyingila monondyuo mbalombwa ohonde. Mokonda yotyo, onombunga ambuho mo Egitu okuhimbikila ko vahona alo kovahepi avesala tyihena omona otyiveli. Mahi povana vo va Isilayeli petupu nawike wankhile. 

Alo umwe omona wa Farao wotyiveli nae ankhi. Farao ehetyivili vali okukoleleya. Liwa-liwa apopila Moisesi na Arau okuti: ‘Tundei pano. Endei, kafendei Huku yenyi. Tyindei ovipako vienyi!’

Puetyi ohanyi yaoya, ova Isilayeli avahimbika okutunda mo Egitu, avatundu-mo monkhalelo yaongana, onombunga nomihoko. Ovalume ova Isilayeli ankho 600.000 no vakai ovanyingi novana. Tupu, ovanthu ovakuavo aveliwaneka no va Isilayeli avaende opo navo vakafende Jeova. Pahe ova Isilayeli vayovoka!

Opo vatualeko okuhinangela oñgeni Jeova eveyovola, kese nima valinga otyipito. Otyipito otyo tyiihanwa okuti o Pasikwa.