Moisesqa, “mananam yapëqa ashishqëkinatsu” nirqanmi faraonta. Peru manaraq ëwakurmi jina kënö nirqan: “Pullan paqasmi Egiptuchö llapan familiakunapa punta kaq wamrankuna wanuyanqa, faraonpa wamrampita qallëkurmi esclävukunapa wamrankunachö ushanqa”.

Israelïtakunataqa kënömi Jehovä nirqan: “Jukläya mikïta alistayë. Juk watayoq achkasta o orqu chiwata (cabrata) pishtayë, y punkupa marcunman yawarninta pilchitsiyë. Nïkur ëtsanta kuwayë y levadürannaq tantawan mikuyë. Y yarquyänëkipaq listu këkäyë, alleq vistikushqa y llanqikushqa. Porqui kanan paqasmi librayashqëki”. Pensari, ¡imanöraq israelïtakuna kushikïkuyarqan!

Pullan paqasmi Egiptuchö llapan wayikunapa Jehoväpa angelnin pasarqan. Y punkupa marcunman yawarta mana pilchitsiyanqan wayikunachöqa punta kaq wamrakunatam wanutsirqan. Peru yawarta pilchitsiyanqan kaq wayikunachöqa manam wamrakunata imanarqantsu. Egiptuchöqa llapan familiakunapam, waktsapa y kapoqyoqpapis wamrankuna wanuyarqan. Peru israelïtakunapaqa manam ni jukpis wanurqantsu.

Faraonpa punta kaq wamrampis wanurqanmi. Tsëmi faraonqa ni imanöpis këta manana puëdir Moisestawan  Aaronta kënö nirqan: “¡Ras ëwakuyë! ¡Ëwakuyë y Diosnikikunata adorayë! ¡Animalnikikunatapis aparkur ëwakuyë!”.

Tsë paqasqa pampa killam karqan. Israelïtakunaqa familiapura y kastapura juntakëkurmi Egiptupita yarquyarqan. Y 600.000 ollqukuna, jina mëtsika warmikuna y wamrakunam kayarqan. Jina mana israelïtakunapis Jehoväta adorayänampaqmi pëkunawan ëwakuyarqan. ¡Israelïtakunaqa por finmi librakäriyarqan!

Jehovä salvanqanta yarpäyänampaqmi israelïtakunaqa cada wata tsë jukläya mikïta rurayänan karqan. Y Pascua nishpam reqiyarqan, tsëqa “janampa pasë” ninanmi.