Moisesmi faraonta prometeran manaña rikunanpaq. Manaraq ripushaspan ichaqa niran: “Kuska tutatan Egiptopi llapa familiamanta phiwi churikuna wañunqaku. Faraonpa wawanpas esclavokunaq wawanpas”, nispa.

Diosmi Israel runakunata niran: “Especial mijunatan preparankichis. Chaypaqmi juj watayoq corderota otaq orqo cabrata ñak’ankichis, yawarnintataq punkuq k’aspinkunaman ch’aqchunkichis. Aychantataq kankaspa mijunkichis mana levadurayoq t’antatawan. Liston kashankichis lloqsinaykichispaq. Kunan tutan Egiptomanta librasaykichis”, nispa. Imaynataraqchá kusikuranku.

Kuska tutatan Diospa angelnin Egiptopi llapa wasikunaman riran. Yawarwan mana ch’aqchusqa wasikunapi kaq phiwi churikunan wañuranku. Yawarwan ch’aqchusqa kaqkunapin ichaqa mana wañurankuchu. Egipto llaqtapiqa llapa phiwi wawakunan wañuranku. Israel runakunaqmi ichaqa mana jujpas wañuranchu.

Faraonpa phiwi churinpas wañupuranmi, chaymi faraonqa Moisesta Aarontawan niran: “¡Ripuychis llaqtaymanta! ¡Jinaspa Diosniykichista adoramuychis! ¡Animalniykichistapas apaspa ripuychis!”, nispa.

 Chay tutaqa junt’an killa kasharan. Jinan Israel llaqtaqa familiakunapi ayllukunapi organizakuspa Egiptomanta puririranku. 600.000 qharikunan karanku, karanmi ancha askha warmikunapas wawakunapas. Waj llaqtayoq runakunapas paykunawan kuskan ripuranku Jehová Diosta adoranankupaq. ¡Libren kapuranku!

Jehová Dios paykuna salvasqanta yuyarinankupaqmi sapa wata juj especial mijunata preparananku karan, chaytan suticharanku “Pascua fiesta” nispa.