Moisesca faraondaca ñana tigramushachu nishpami rirca. Shinapash nara rishpallatami nirca: ‘Chaupi tutami Egiptopi causajcunapa punda churicunaca tucuilla huañunga. Faraonba punda churimanda callarishpa, faraonda sirvijcunapa punda churicunapashmi huañunga’ nishpa.

Jehová Diosca israelitacunataca nircami: ‘Cangunapa familiacunamandaca maltun llamata japinguichi. Chaitaca Diosman cushpa pascua punllapi huañuchinguichi’. ‘Chai yahuarmanda ashata japishpami pungu jahua caspipipash, punguta charijuj ishcandi lado caspipipash javina canguichi’. ‘Shinallata chai tutaca, ninapi cusashca aichata, levadura illaj tandata micunguichi’. ‘Ashtahuanbash ali chumbilirishcalla, chaquipipash churajushcallami’ cana canguichi. Cai tutami cangunataca salvasha nishpa. Israelitacuna chaita uyashpaca ¿imashinashi sintirirca?

Ña chaupi tutaca Jehová Diospa shuj angelmi Egiptopi tucui huasicunata yalirca. Huasi pungu caspi na yahuarhuan javishca cajpica, chai huasipi punda churitaca huañuchircami. Shinapash huasi pungu caspi yahuarhuan javishca cajpica, chai huasipi punda churitaca na huañuchircachu. Egiptomanda familiacuna charij o pobre cajpipash paicunapa punda churicunaca huañurcami. Shinapash israelitacunapa punda churicunaca ni shujllapash na huañurcachu.

Faraonba punda churipashmi huañurca. Chaimandami faraonga ñana ushashpa Moisestapash, Aarondapash cashna nirca: ‘Cangunapash, israelitacunapash, Ilujshichilla.  Canguna imashna nishcashnallata, Mandaj Diosta sirvingapaj richilla. Cangunapa llamacunatapash, huagracunatapash apashpa richilla’ nishpa.

Chai tutaca luna tutami carca. Tucuilla israelitacunami familiapura tandanajushpa Egiptomanda llujshishpa rirca. Shinallata seiscientos mil jaricuna, ashtaca ashtaca huarmicuna, huahuacuna, huaquin na israelitacunapashmi Jehová Diosta adorangapaj paicunahuan rirca. Shinami israelitacunataca Jehová Diosca salvarca.

Jehová Dios israelitacunata salvashcata yaringapaca cada huatami maltun llamagupa aichata cusashpa, levadura illaj tandahuan micuna carca. Chaitami pascua micuna nin.