O Mojsije obećindža e faraonese so na ka avel paljem koro ljeste. Ama, angljeder te džal oljestar, phendža ljese: „Ki ekvaš i rat, sa o prvobijande murša ko Egipat, ando e faraoneso čhavo pa sa dži e robonenge čhave, ka meren.“

O Jehova vačerdža e Izraelcendže te čeren jekh posebno hajbe. Ov phendža ljendže: „Čhinen jekhe bakre ja jare, nek ovel lje jekh berš hem oljese rateja makhen samo o okvirija ando udara. Peken o mas hem han lje e mareja kova tano bizo kvasco. Dži hana, oven uravde, o sandale nek oven tumendže ko pre hem oven spremna te podžinen. Akija rat ka oslobodinav tumen.“ Šaj li te zamisline kobor hine radosna o Izraelcija?

Ki ekvaš i rat, e Jehovaso anđeo nakhlja svako čher ko Egipat. Ko udara kaj na hine rat, mudardža e prvobijande čhave. Ama, ko čhera so hine makhlje rateja, na čerdža ništa. Ki svako egipatsko porodica, barvalji ja čorori, mulo oljendar o čhavo. Ama, sa o prvobijande izraelska čhave ačhilje dživde.

Mulo čak hem e faraoneso čhavo. O faraon naštindža više te izdržini akava. Ov odmah vačerdža e Mojsijese hem e Aronese: „Džan tumendže akatar. Džan hem služinen tumare Devljese. Ljen tumare životinjen hem džan tumendže!“

 Ked hine pherdi i mesečina, o Izraelcija ikljilje ando Egipat, podelime ko porodice hem ko plemenija. Hine 600 000 izraelska murša hem but džuvlja hem čhave. Isto adžahar, oljencar hine hem avera manuša so ikljilje ando Egipat hem dželje te služinen e Jehovase. O Izraelcija konačno hine oslobodime!

Te šaj te setinčeren pe sar o Jehova spasindža ljen, on valjandže svako berš te spreminen asavko posebno hajbe. Akava dive vičindža pe Pasha.