О Моисеё дя алав лэ фараоности, кай будэр на авэла каринг лэстэ. Но сар жаластар, во ԥэндя: «Андэ епаш рят андо Египто, андэ кажно ери, мэрэла пэрво бэято. Кадя авэла всаворэндэ, жы лэ фараоностирэ шавэстар жы кай и бэятцэ, савэ кай и раборя».

О Иегова ԥэндя лэ израильтянонэнди тэ стерэн хамос, саво на терэнас пэ авэр мисяйли. Во ԥэндя: «Лэн бакрэс, савэсти ек бэрш или лэ бузнэс. И мақэн лэстирэ ратэса и косякоря кай и двэри. О мас гитон пэ яг и похан лэс лэ марнэса, саво би дрожжэнго. Лэн пэр тумэндэ, лэн пэ пэрнэ и аштярэн, кай тэ жантар. Андэ кадэя рят мэ вимэкава тумэн». Погиндосар, сар дэ фартэ загиндонаспэ израильтяноря пала када!

Андэ епаш рят лэ Иеговаско анӷело прожыля па вся Египто. Андэ всаворэ цэра, кай на сас и косякоря мақлэ ратэса, пэрви бэятцэ мулинэ. О анӷело на зажыля кати андэ цэра, кай и косякоря сас мақлэ ратэса. Андэ кажно египетско ери, кай и барвалэ и кай чорэ, муля варико анда бэятцэ. Кадя мардя лэн о Дэл. Но кай и израильтяноря ни еқэ бэятоса нисо на стердяпэ.

Муля даже лэ фараоноско шаво. Важ о фараоно када сас фартэ бари бида. Во ԥэндя лэ Моисеёсти и лэ Аароности: «Вщен! Ужантар катар, кай тумэн тэ на диқэн мэрнэ яқа! Жан и стон празднико пэстирэ Дэвлэсти. Залэн о ското и ужантар!»

 И рят, кала по нэбо сас ԥэрдо шон, израильтяноря вижылэ анда Египто. Вонэ стидэпэ лэ еренца и па племенам, ай тоди вижылэ ек пала ек. Лэн сас фартэ бут. Лэ муршэн сас 600 000, ай инке сас бут жувля и бут бэятцэ. Ай кадяжэ слинэ мануша анда авэр народоря, савэ закамлэ тэ кандэн лэ Иеговас. Акана лэ израильтянонэн нико на ритярэл!

Но кай тэ сэрэн, кай о Иегова вимэкля лэн, вонэ трэбуй сас тэ терэн кадэва хамос кажно бэрш, саво на терэнас пэ авэр мисайли. Пэ када линэ тэ ԥэнэн патради, кадэла алава сыкавэн «прожал мимо».