Na fai atu Mose iā Farao o le a lē toe sau iā te ia. Ae a o leʻi alu ese Mose, na ia fai atu iā Farao: ʻI le tā o le sefulu lua i le pō, o le a feoti ai ulumatua uma o Aikupito, mai lava i le atalii o Farao e oo i atalii o pologa.’

Na faatonuina e Ieova tagata Isaraelu ina ia faia se ʻaiga faapitoa. Na ia faapea atu: ʻIa tapē se tamaʻi mamoe po o se tamaʻi ʻoti e tasi le tausaga le matua, ona ave lea o lona toto ma sausau ai luga o le faitotoʻa e ulu atu ai i totonu o lou fale. Ia tunu le aano, ona ʻai lea faatasi ma le falaoa e lē faafefeteina. Ia fai outou ofu ma seevae, ma sauni e ō. O le pō lenei o le a ou faasaʻolotoina ai outou.’ Seʻi mafaufau i le matuā fiafia o tagata Isaraelu i lenā tala!

I le tā o le sefulu lua i le pō, na alu atu ai le agelu a Ieova i fale uma i Aikupito. O fale uma e leʻi sausauina i le toto luga o faitotoʻa, na fasiotia a latou ulumatua uma. Ae na pāsia e le agelu fale sa sausauina i le toto luga o faitotoʻa. Na fasiotia ulumatua a aiga uma lava i Aikupito, e tusa pe mauʻoa pe matitiva. Ae e leʻi iai ma se tamaitiiti Isaraelu na oti.

E oo lava i le atalii o Farao na fasiotia. Ua lēlavā e Farao onosaia nei mea. O lea na ia fai atu ai loa iā Mose ma Arona: ʻIa  tulaʻi ma ō ese loa. Ō e tapuaʻi i lo outou Atua. Ave a outou manu ma ō ese loa.’

Na ō ese tagata Isaraelu mai i Aikupito, a o atoa le masina. Na faamaopoopo i aiga ma ituaiga. E toʻa 600,000 tamāloloa Isaraelu na iai, faapea le toʻatele o fafine ma tamaiti. E toʻatele foʻi isi tagata sa ō faatasi ma tagata Isaraelu, ina ia latou tapuaʻi foʻi iā Ieova. Ua iʻu lava ina faasaʻolotoina tagata Isaraelu!

O tausaga taʻitasi uma lava, sa tatau ona faia ai e tagata Isaraelu lenā ʻaiga faapitoa, ina ia manatua ai le auala sa faasaʻolotoina ai i latou e Ieova. Na taʻua lenā ʻaiga faapitoa o le Paseka.