Mosi wetsembisa Faro kutsi angeke aphindze abuye futsi. Kodvwa angakahambi watsi kuFaro: ‘Ekhatsi nebusuku onkhe ematibulo aseGibhithe atawukufa, kusukela etibulweni laFaro.’

Jehova watjela ema-Israyeli kutsi abe nelidzili. Watsi: ‘Bulalani imvu nobe imbuti lendvuna lenemnyaka munye, nitsatse lenye yengati yayo niyifafate etinsikeni totimbili teminyango yetindlu. Kufanele niyose emlilweni futsi niyidle kanye nesinkhwa lesite imvubelo. Niboyidla nibophe emabhande enu, nigcoke tincabule etinyaweni tenu. Ngalobo busuku, ngiyonikhulula.’ Ucabanga kutsi ema-Israyeli abejabule kangakanani?

Ebusuku, ingilosi yaJehova yayihambahamba eGibhithe. Ematibulo labafana labekasetindlini lebetingakabhocwa ngengati emnyango afa. Kodvwa lengilosi beyitendlula tindlu letibhocwe ngengati. Yonkhe imindeni yaseGibhithe yafelwa bantfwana. Kodvwa akuzange kufe ngisho namunye umntfwana kuma-Israyeli.

Ngisho nendvodzana yaFaro yafa. Faro akazange akhone kukubeketelela loko. Ngekushesha watsi kuMosi na-Aroni: ‘Hambani la, niphume niphele. Hambani niyokhonta Nkulunkulu wenu. Tsatsani nemihlambi yenu nihambe!’

 Ema-Israyeli akhanyiselwa yinyeti aphuma eGibhithe ahamba ngemindeni. Kwakungemadvodza lacishe abengu-600 000, kanye nebafati nebantfwana labanyenti. Bantfu labanyenti labebangasiwo ema-Israyeli babalandzela kuze nabo bayokhonta Jehova. Ema-Israyeli agcine akhululekile.

Kute akhumbule indlela Jehova lawakhulula ngayo, abenta lidzili njalo ngemnyaka. Belibitwa ngekutsi liPhasika.