Moses i promisim Fero olsem em bai i no inap lukim em gen. Tasol paslain long Moses i go, em i tokim Fero: ‘Long biknait, olgeta fesbon long kantri Isip, stat long pikinini man bilong Fero i go long ol pikinini man bilong ol sleiv, olgeta bai i dai.’

Jehova i tokim ol Israel long redim wanpela spesel kaikai. Em i tok: ‘Kilim wanpela sipsip o meme i gat wanpela krismas, na putim sampela blut bilong en long pos bilong dua. Kukim mit bilong en long paia, na kaikai wantaim bret i no gat yis. Pasim ol klos na ol sendol bilong yupela, na redi long i go. Long dispela nait mi bai kisim bek yupela.’ Yu inap piksaim amamas bilong ol Israel?

Long biknait, ensel bilong Jehova i go long olgeta haus long Isip. Ol haus i no gat blut long pos bilong dua, ol fesbon bilong ol i dai. Tasol ensel i abrusim ol haus i gat blut long pos bilong dua. Olgeta famili bilong Isip, maniman na rabisman, ol pikinini bilong ol i dai. Tasol no gat wanpela pikinini bilong ol Israel i dai.

Pikinini bilong Fero tu i dai. Fero i belhat nogut tru. Kwiktaim em i tokim Moses na Aron: ‘Lusim mipela. Lusim mipela na go. Go na lotuim God bilong yupela. Kisim ol animal bilong yupela na go!’

 Em i ful mun, ol Israel i wokabaut lusim Isip na i go, ol i oganaisim ol long ol famili na traib. I gat 600,000 man Israel na planti meri na pikinini. Na tu, planti narapela manmeri i go wantaim ol na bai ol inap lotuim Jehova. Nau ol Israel i kamap fri!

Bilong tingim hau Jehova i bin seivim ol, ol i save mekim dispela wankain spesel kaikai long olgeta yia. Ol i kolim Pasova.