Моисей фараонга моон соңгаар келбезин аазаан. Ынчалза-даа чоруур мурнунда ол мынча дээн: «Дүн ортузунда фараоннуң оглундан эгелээш кул херээженниң оглунга чедир Египетте дун оолдар шупту өлүр».

Иегова израильчилерге тускай кежээки чемни белеткээрин дааскан. «Бир харлыг эр анайны азы хураганны дөгергеш, ооң ханы-биле эжииңерниң кастыктарын чаап алыңар. Ооң эъдин быжыргаш, ажыткы чок хлеб-биле кады чиңер. Чоруурунга белен кылдыр идик-хевиңер кедип алыңар. Бо дүне силерни хостаар мен» — деп, ол чугаалаан. Сагыштаалап көр даан, бо сөстер израильчилерни кайы хире хөлзедипкен-дир?

Ол дүне Иегованың ангели бүдүн Египетти кезипкен. Эжииниң кастыктарында хан чагбаан бажыңнарда дун оолдар шупту өлүп калган. Ангел чүгле эжииниң кастыктарында ханныг бажыңнарже кирбээн. Египетте бай-даа, ядыы-даа өг-бүлелерде дун оолдар чок апарган. А израильчилерниң ажы-төлүнден кым-даа өлбээн.

Фараоннуң оглу безин чок апарган. Фараон ол бүгүнү шыдашпайн, Моисей биле Ааронга ол дораан мынча дээн:  «Туруңар! Моон чоруп чоруңар! Барыңар, Бурганыңарга бараалгаңар. Мал-маганыңар ап алгаш, чоруңар!»

Айдың дүне израильчилер Египеттен үнүпкен. Олар өг-бүле болгаш аймак аайы-биле чурум-чыскаалдыг чорупканнар. Херээжен улус биле ажы-төлдү санавас болза, 600 000 хире эр кижи турган. Оларның аразынга Иеговага бараалгаксай берген өске чоннардан улус база турган. Ам-на израильчилер хосталганы алган!

Иегованың оларны канчаар хостаанын сактып чоруур дээш, олар чыл санында тускай кежээки чемни белеткээр ужурлуг турган. Ооң адын Хосталыышкын байырлалы дээр.