Te Moisés la yalbey ta jamal te faraón te maʼyukix bin-ora ya xbajtʼ ta stojole. Pero te kʼalal mato xlokʼ bael-ae, la yalbey: “Ta olil ajkʼabal, te ba alal yuʼun te familiaetik ta Egipto yame xlajik, jaʼnix jich te snichʼan te faraón sok te ba alal yuʼun te mosoetike”.

Te Jehová la yaltiklanbey te israeletike: “Pasaik jun weʼelil te mukʼ skʼoplal. Milaik jkojt tut tuminchij o jkojt tut tentsun te jun jaʼbil schʼiel sok tsijtsanbeyaik jtebuk schʼichʼel ta sjol te puertae. Woaik te tiʼbal sok weʼaik sok pan te maba yichʼoj levadura. Chapalukme ayex swenta ya xlokʼex bael, ya skʼan te alapojikix akʼuʼ apakʼik-a sok te axanabike. Ta ajkʼabal ini ya kakʼex ta libre”. ¿Yabal xkʼot ta awoʼtan te stseʼelil yoʼtan la yaʼiy te israeletike?

Ta olil ajkʼabal, te chʼul-abat yuʼun te Jehová kʼax ta spisil naetik yuʼun te Egipto. Te banti la yil te maba tsijtsanbil ta chʼichʼ te sjol te puertae, laj te ba alale. Pero te banti tsijtsanbil ta chʼichʼe, te chʼul-abat maʼyuk bin la spasbey stukel te ba alale. Spisil te familiaetik ta Egipto, manchukme jkʼulejetik o meʼbaetik, laj te ba alal yuʼunike. Yan stukel te ba alal yuʼun te israeletik maba lajik.

Te sba snichʼan te faraón laj-euk. Te faraón ma juʼix yuʼun stsʼikel, jich yuʼun la yalbey te Moisés sok te Aarón: “¡Lokʼanik ta jtojol! ¡Lokʼanik bael,  ichʼaik ta mukʼ te Dios awuʼunike! ¡Ikʼaik bael te achambalamik sok baanik!”.

Ta ajkʼabal-abi syijil-a te ue. Te israeletik chapbil ta lek ta jujun familia sok ta jujun tsʼumbalil te kʼalal lokʼik tal ta Egipto. Ay 600,000 ta tul winiketik sok ipal antsetik soknix alaletik. Bayal te machʼa ma jaʼuk stsʼumbalik te Israel jaʼnix jich lokʼik tal ta Egipto swenta ya yichʼik ta mukʼ te Jehová. ¡Kʼot yorail te la yichʼ akʼel ta libre te israeletike!

Swenta ya snaʼulanik te bitʼil la yichʼik koltayel yuʼun te Jehová, ya skʼan jujun jaʼbil ya spasik te weʼelil te mukʼ skʼoplale. La sbiilintesik Pascua.