Hi Moises nagsaad ha Paraon nga diri na hiya makikigkita utro. Pero antes hiya bumaya, hiya nagsiring: ‘Ha katutnga han gab-i, an ngatanan nga suhag ha Ehipto, tikang ha anak nga lalaki han Paraon tubtob ha anak nga lalaki han mga uripon, mamamatay.’

Ginsidngan ni Jehova an mga Israelita nga magkaada espesyal nga pangaon. Hiya nagsiring: ‘Pag-ihaw kamo hin usa ka tuig nga lalakí nga karnero o kanding, ngan butangi hin dugo hito an iyo purtahan. Litsona an karne ngan kaona upod hin tinapay nga waray ipaturubo. Pagliwan kamo, pagsandalyas, ngan pag-andam ha paglakat. Yana nga gab-i, ihahatag ko ha iyo an iyo kagawasan.’ Nahuhunahuna mo ba kon ano kaeksayted an mga Israelita?

Ha katutnga han gab-i, an anghel ni Jehova kumadto ha tagsa nga balay ha Ehipto. Ginpatay niya an suhag nga anak ha mga balay nga waray dugo an purtahan. Pero ginlabyan niya an mga balay nga ginbutangan hin dugo. Ngatanan nga pamilya han mga Ehiptohanon, riko ngan pobre, namatyan hin anak. Pero waray bata nga Israelita nga namatay.

Bisan an anak han Paraon namatay. Waray na makailob an Paraon. Iya dayon ginsidngan hira Moises ngan Aaron: ‘Iwas kamo dinhi. Lakat ngan pagsingba ha iyo Dios. Dad-a an iyo mga hayop ngan lakat!’

 Kadayaw hito nga gab-i. An mga Israelita nagmartsa tipagawas ha Ehipto, nga nakaorganisar uyon ha ira pamilya ngan tribo. May-ada 600,000 nga kalalakin-an ngan damu nga kababayin-an ngan kabataan. Damu liwat nga diri Israelita an inupod ha ira basi magsingba kan Jehova. May kagawasan na gihap an mga Israelita!

Basi hinumdoman kon paonan-o hira gintalwas ni Jehova, may espesyal hira nga pangaon kada tuig pariho han ira ginhimo antes hira makagawas ha Ehipto. Gintawag ito nga Paskua.