Mose ŵamsalile Falao kuti ngasawonecelasoni kwa jwalakwe. Nambo Mose mkananyakuce, ŵamsalile jwalakwe kuti, ‘Pasikati pa cilo, mwanace jwalijose jwandanda kupagwa mu Iguputo kutandila mwanace jwa Falao mpaka mwanace jwa kapolo cawe.’

Yehofa jwasalile Ayisalayeli kuti alinganye cakulya capajika. Ni jwatite kuti, ‘Awulaje mwanace jwamlume jwa ngondolo kapena jwa mbusi jwa caka cimo, ni ajigale miyasi jakwe apace m’matanga gawo. Ajoce nyamajo ni alile pamo ni mkate wangali cakusasaŵisya. Awale sapato syawo ni atande kukosecela ulendo. Ciloci une cindendekasye kuti mjawuleje.’ Ana mkuganisya kuti Ayisalayeli ŵasangalele camtuli pandaŵiji?

Ni pasikati pa cilo lilayika lya Yehofa lyapite kunyumba jilijose ja Aiguputo. Nyumba syanganapaka miyasi palitanga lyakwe mwanace jwandanda kupagwa jwawaga. Nambo lilayikalyo lyagambaga kupitilila nyumba syele syakwete miyasi palitanga lyakwe. Liŵasa lililyose lya Aiguputo cinga lyakusicila kapena lyakulaga lyalusile mwanace. Nambo paliji pangali mwanace atamose jumo jwa Ayisalayeli juŵawile.

Nombe najo mwanace jwamlume jwa Falao jwawile. Yeleyi yampwetece mnope Falao. Jwalakwe mwacitemacitema ŵamsalile Mose soni Aloni kuti, ‘Mnyakuce. Mtyoce akuno. Mjawuleje ni mkamlambileje Mlungu jwenu. Mjigale yilango yenu ni mjawuleje.’

 Lwesi luli lwamtundu, Ayisalayeli ŵatyosile ku Iguputo mwakamulana ni maŵasa gawo soni ngosyo syawo. Acalume ŵa Ciyisalayeli ŵapali 600,000 soni papali acakongwe ni ŵanace ŵajinji. Nambosoni ŵandu ŵane ŵajinji ŵapite nawo kuti akamlambileje Yehofa. Ayisalayeli ŵagopoledwe ku ukapolo.

Ayisalayeli ŵatendaga cindimba capajika caka cilicose pakusaka kumbucila muŵakulupucisye Yehofa. Cindimbaci ŵacikolangaga kuti Pasaka.