Moiseseʼ tu yaʼalaj tiʼ faraón maʼ tun suut u kaʼa ile. Chéen baʼaleʼ táanil tiʼ u bineʼ tu yaʼalajtiʼ: ‹Chúumuk áakʼabeʼ yaan u kíimil tuláakal u yáax hijo le egipcioʼoboʼ. Yaan u kíimil u yáax hijo faraón, bey xan u yáax hijo le esclavoʼoboʼ›.

Jéeobaeʼ tu yaʼalaj tiʼ le israelitaʼoboʼ: ‹Beeteʼex junpʼéel janal teʼ áakʼabaʼ, kíimseʼex juntúul taman wa juntúul chan chivo yaan junpʼéel año tiʼ. Wiʼiwitsʼeʼex u kʼiʼikʼel tu marcoil u joonajil le najoʼ. Kʼáaʼteʼex u bakʼel ka a jaanteʼex yéetel waaj minaʼan u levadurail. Líiʼsabaʼex utiaʼal a bineʼex, tsʼáa a nookʼeʼex yéetel a xaanabeʼex. Tumen teʼ áakʼab ken in jáalkʼabteʼexaʼ›. Máans ta tuukul bix kiʼimakchajik u yóol le israelitaʼoboʼ.

Chúumuk áakʼabeʼ u ángel Jéeobaeʼ bin tu yotoch le egipcioʼoboʼ. Teʼ tuʼuxoʼob maʼ wiʼiwitsʼaʼan le kʼiʼikʼ tu marcoil le joonajoʼ, kíim le yáax hijotsiloʼ. Chéen baʼaleʼ teʼ najoʼob tuʼux wiʼiwitsʼaʼan le kʼiʼikʼoʼ le angeloʼ maʼ tu beetaj mix baʼaliʼ. Tiʼ tuláakal le familiaʼob yaan Egiptooʼ, kex ayikʼaloʼob wa óotsiloʼobeʼ, kíim juntúul u hijoʼob. Chéen baʼaleʼ le israelitaʼoboʼ mix juntúul u hijoʼob kíimi.

Kíim xan u yáax hijo faraón. Letiʼeʼ jach yaachaj u yóol, le oʼolal tu yaʼalaj tiʼ Moisés yéetel tiʼ Aarón: ‹¡Xeeneʼex! Jóokʼkeʼex tin kaajal. Xeeneʼex a adorarteʼex a Dioseʼex, chʼaʼ a walakʼ baʼalcheʼexeʼ ka xiʼikeʼex›.

 Teʼ áakʼaboʼ táan kaʼach u beetik luna llena. Le israelitaʼoboʼ tu tsoolol úuchik u jóokʼloʼob Egipto, muʼuchʼoʼob por familia yéetel tribuʼob. Yaan kaʼach 600,000 u túulal xiiboʼob, yaʼabkach koʼoleloʼob bey xan mejen paalaloʼob. Yaʼab máakoʼob maʼ israelitaʼobeʼ binoʼob xan tu yéeteloʼob u adorartoʼob Jéeoba. ¡Beoraaʼ maʼ palitsiltaʼan le israelitaʼoboʼ!

Utiaʼal u kʼaʼajsikoʼob salvartaʼaboʼob tumen Jéeobaeʼ cada añoeʼ unaj u beetkoʼob kaʼach le janal aʼalaʼabtiʼoboʼ, lelaʼ u kʼaabaʼeʼ Pascua.