Gudxi Moisés Faraón zuyubi modo para cadi guibiguetaʼ guʼyaʼ laabe sti biaje. Peru ante guiree Moisés de ra nuube gudxi laabe ni guníʼ Jiobá: «Biaʼ galaa gueelaʼ, zati guiráʼ baʼduʼ primé stiʼ cada familia nuu Egipto, zati xiiñiʼ Faraón ne xiiñiʼ ca esclavu».

Jiobá gudxi ca israelita: «Laguni ti guendaró especial. Laguuti ti dendxuhuiiniʼ o ti chivuhuiiniʼ de ti iza, ne lagunéʼ caadxi rini stime lu marcu stiʼ puertaʼ stitu. Laugaaguiʼ beela ca lu buu ne la gó ni ne pan sin levadura. Lachuu listu para guireetu, laguicaa xhábatu ne lagucaa ñee elaguidi stitu. Gueelaʼ riʼ zabee laatu». ¿Ñee ruxuíʼluluʼ pabiáʼ nayecheʼ guyuu ca israelita la?

Galaa gueelaʼ que, gudiʼdiʼ ángel stiʼ Jiobá ra lidxi ca egipciu. Ra puertaʼ ni cadi néʼ rini, biiti ángel que baʼduʼ primé sticaʼ. Ne ra puertaʼ ra néʼ rini que, qué ñuni diʼ ángel que gastiʼ xiiñicaʼ. Guiráʼ ca familia de Egipto, ricu ne pobre, guti baʼduʼ primé sticaʼ. Peru nin tobi de ca xiiñiʼ ca israelita qué ñati.

Laaca guti baʼduʼ primé stiʼ Faraón. Maʼ qué ñanda ñuni huantar Faraón, ngue runi gúdxibe Moisés ne Aarón: «¡Laguiree de raríʼ! ¡Laché ne laguni adorar Dios stitu! ¡Lachiné ca maniʼ stitu ne laguiree de raríʼ!».

 Gueelaʼ que nuu luna llena. Biree ca israelita que pur grupu de familia ne tribu. Biree biaʼ xhoopaʼ gayuaa mil hombre, aparte de ti grupu naroʼbaʼ de gunaa ne xcuidi. Laaca bireené stale binni ni cadi israelita laacabe para guni adorarcaʼ Jiobá. ¡Yanna huaxa maʼ libre ca israelita!

Para guietenaláʼdxicabe bilá Jiobá laacabe, naquiiñeʼ gúnicabe guendaró especial que guiráʼ iza. Gulee lácabe ni Pascua.