Moize akido Faro nga ko abingo ko berewe te. Ono mbata fu ko guari, ko aya fu Faro: ‘Bebere yuru, bambata avungu dunduko nga ga aEzipeto, tona ti wiri Faro ki da ti awiri gayo akanga, nika kpiko.’

Yekova aya fu aYisaraere wẽ i ri kparakpara riahe. Ko aya: ‘Oni imi gaoni ameme watadu akandoro agura nga abara, na ki moi kurera ti gaoni pangbadimo. Oni zokodi pasio ra na ki rihe na gu kpakuto adunga na agbooro rogoho ya. Oni vodi tironi na gaoni arakata, ki du regerege tipa nduge. Rogo gu yuru du areme, mi nika zaka roni oni ndu.’ Ya mo mo rengbe ka berãpa gu ngbarago aYisaraere adu na ni?

Bebere yuru, ga Yekova maraika andu rogo agu akporo dunduko naadu Ezipeta yo. Gu kporo naadunga na kure pangbadimo ho ya, bambata vungu nga ga gu kporo re anikpi. Ono maraika anaaguagu rii gu kporo du pangbadimo ho na kure. Aborokporo Ezipeta yo dunduko, airakumuko gbiati airarungo awiriyo akpiki. Ono gude ho kandara sa nakpi be aYisaraere te.

Zavura kina wiri Faro, ko aima kpi a. Faro aarengbanga ka hi gure berewe te. Nibasa, ko aya fu Moize na Arona wẽ: ‘Oni guari. Oni guari rogo gi ba re. Oni ndu ka iriso gaoni Mbori. Oni di gaoni anya dunduko ki ndu!’

 AYisaraere akuru Ezipeta yo ti gu regbo diwi akii wenengai, i dunduko adu ni mbakadimbakadi yo ku rogo arii akporo. Bange aYisaraere dunduko adu nga 600,000 nga akumba, adee na agude. Na berewe, gu kura dungu aboro aima kura sa na yo a tipa wa ka i irisi Yekova. AYisaraere agbia ranirii niyangaraha!

Tipa ka tingidapa wai Yekova abatasiyo, i atona kaa ri gu kparakpara riahe re na agarã dũ. I anaayambaha nga Pumbo Susiri.