Moisés gochbu faraón que ma diti nabiguetbu. Per antes ni nareʼbu nisló faraón, goniʼbu: «Galaʼ gueʼel reʼ, guirá xiin lagol buñ egipcio saityibu, saity xiin faraón dada xiin xomósbu».

Jehová gochbu israelitas: «Gonytzaayto toib galrro. Guigaityto toib xilieen o toib chiv de tobiz, né colguitzaa xirunymu laidy xpuerto. Guicuʼto xpeʼelmu né guáto láani né páa ni diti guiótz levadur. Coltzoʼ puext par guireʼto, colguac xhapto né colguicañeʼ xcalguitto. Portín gueʼel reʼ sabeʼya lóoto ló xcalmandary egipcios». Xpensaryto, ¿ximod gosac israelitas ór cú?

Galaʼ gueʼelcu, ángel xtuny Jehová godudy lidx guirá buñ egipcios. Bigaitybu guirá xiin lagol buñ Egipto ni diti bigas runy roʼ xpuert. Per diti bigaitybu guirá xiin lagol buñ ni góos runy roʼ xpuert. Guirá xiin buñ egipcios goity ná gocyibu buñ ric o yaca, per ni toib xiin israelitas goity.

Dada xiin lagol faraón láaca goity. Faraón ma bianyñal nacalóbu más Jehová né gochbu Moisés né Aarón: «¡Colguireʼ! ¡Coltzé né colguien Dios xtunyto! ¡Coltzané xinimalto né coltzé!».

 Gueʼelcu goyoʼ beʼo goyal. Israelitas bidopyibu por family né bireʼyibu Egipto. Bireʼ 600.000 buñguieeu, né láaca xidalguixo buñgonaʼ né mbiox. Láaca xidal ni diti góc israelitas goyee né layibu par bienyibu Jehová. ¡Orcúra ma diti goyoʼ ni buny mandary layibu!

Guirá íz ñonytzaayibu galrrocuca par nasetnaladxyibu que Jehová bilaa layibu. Goleʼyibu laa laniicu Pascua.