Benɛ Farao nu kaa Israel bi ɔmɛ je Ijipt ma a mi ɔ, e pee e juɛmi kaa e ma ha nɛ a kpale a se. E fã e ta buli ɔmɛ ke: ‘Nyɛɛ ngɔ ye ta zugba lɛ ɔmɛ tsuo kɛ ba, nɛ waa nyɛɛ a se! Jinɛ e sɛ nɛ waa ngmɛɛ a he.’ E kɛ e ta buli ɔmɛ nyɛɛ Israel bi ɔmɛ a se.

Yehowa nyɛɛ e we bi ɔmɛ a hɛ mi. Ke je na a, e kɛ bɔku tsɔɔ mɛ blɔ, nɛ ke je jɔ ɔ, e kɛ la tsɔɔ mɛ blɔ. E kɛ mɛ ya Wo Tsu ɔ nya, nɛ e de mɛ ke a to si ngɛ lejɛ ɔ.

Israel bi ɔmɛ na kaa Farao kɛ e ta buli ɔmɛ nyɛɛ a se kɛ ma. Israel bi ɔmɛ nyɛ we nɛ a ya a hɛ mi, nɛ a nyɛ we nɛ a ya a se hulɔ, ejakaa wo ɔ ngɛ a hɛ mi, nɛ Ijipt ta buli ɔmɛ hu ngɛ a se kɛ ma. A de Mose ke: ‘Ao, wa gbo! Jinɛ e sa nɛ o si wɔ ngɛ Ijipt.’ Se Mose de mɛ ke: ‘Nyɛ ko ye gbeye. Nyɛ ná tsui, nɛ nyɛɛ hyɛ bɔ nɛ Yehowa ma plɛ kɛ he wa yi wami ha.’ Mose ngɛ hemi kɛ yemi ngɛ Yehowa mi wawɛɛ, aloo kɛ o susu kɛɛ?

Yehowa de Israel bi ɔmɛ ke a dla a he, nɛ a tsa a blɔ hiami ɔ nɔ. Jamɛ a nyɔ ɔ mi ɔ, Yehowa ha nɛ bɔku ɔ ya da Ijipt bi ɔmɛ kɛ Israel bi ɔmɛ a kpɛti. Diblii wo ngɛ Ijipt bi ɔmɛ a ngɔ, se Israel bi ɔmɛ a ngɔ lɛɛ la ngɛ.

Yehowa de Mose ke e wo e nine kɛ tsɔɔ wo ɔ. Kɛkɛ nɛ  Yehowa ha nɛ kɔɔhiɔ ngua ko fia jamɛ a nyɔ ɔ mi tsuo. Wo ɔ mi gba enyɔ, nɛ blɔ ba je kpɛti. Wo ɔ pee kaa gbogbo ngɛ a hiɔ nɔ kɛ a muɔ nɔ, nɛ Israel bi ayɔhi abɔ nyɛɛ zugba gbigbli ɔ nɔ kɛ ho wo ɔ se ya.

Farao kɛ e ta buli ɔmɛ nyɛɛ Israel bi ɔmɛ a se. Mɛ hu a gu blɔ nɛ ba wo ɔ mi ɔ nɔ. Kɛkɛ nɛ Yehowa ha nɛ ta buli ɔmɛ tsuo a juɛmi gbɛ. A ta zugba lɛ ɔmɛ a nane bɔni hiami. Ta buli ɔmɛ kpã ngmlaa nɛ a de ke: ‘Nyɛ ha nɛ waa kpale wa se, ejakaa Yehowa ngɛ ta hwue ha mɛ!’

Yehowa de Mose ke: ‘Ngɔɔ o nine kɛ tsɔɔ wo ɔ.’ Amlɔ nɔuu nɛ nyu ɔ nɛ pee kaa gbogbo ɔ ku kɛ pue Ijipt ta buli ɔmɛ a nɔ. Farao kɛ e ta buli ɔmɛ tsuo gbo, nɔ kake ngmelu po yi ná we wami.

Israel bi ɔmɛ lɛɛ a ya su wo ɔ se slɔkee, nɛ a la kɛ je Mawu yi ke: ‘Nyɛ ha wa la kɛ je Yehowa yi, ejakaa e hɛ mi ba nyami wawɛɛ. E tsɛ̃ okpɔngɔ kɛ e nɔ hilɔ ɔ kɛ fɔ wo ɔ mi.’ Benɛ a ngɛ lae ɔ, yi ɔmɛ ngɛ doe nɛ a ngɛ akasawa fiae. Mɛ tsuo a bua jɔ kaa jehanɛ ɔ lɛɛ a ye a he.