Israelitanakajj Egiptot sarjjapjjatap yatïna ukhajja, faraonajj jupanakar khitjjatapat wal arrepentisïna. Ukatwa soldadonakapar säna: ‘Guerratak utjki uka carronak taqpach wakichtʼapjjam, israelitanakar arktañäni. Jupanakar libre khitatasajj janiw walïkiti’ sasa. Ukatsti faraonasa, soldadonakapasa israelitanakaruw arktapjjäna.

Jehová Diosaw markaparojj irpaskäna, urojja mä qenayampiw irpäna, arumasti mä ninampiw irparakïna. Mar Rojo sat qotar puriyasajja, akawjar carpanakam saytʼayapjjam sarakïnwa.

Israelitanakajj faraonampi soldadonakampi jutapjjatap amuyasajj janiw kawkir escapañsa puedepkänti. Mä toqetjja qotaw jarktʼanïna, maysa toqetsti faraonampi soldadonakapampiw jutapjjäna. Ukatwa Moisesar akham sapjjäna: ‘¡Jiwarañäniwa! ¿Kunatsa Egipto markat irpsunipjjesta?’ sasa. Moisesasti sarakïnwa: ‘Jan ajjsarapjjamti. Suytʼapjjam, kunjamsa Jehová Diosajj salvistani uk uñjapjjarakim’ sasa. Moisesajj walpun Diosar confiyäna, ¿uk amuytati?

Qhepatsti sarjjañatak wakichtʼasipjjam sasaw Jehová Diosajj israelitanakar säna. Uka arumajja, Jehová Diosajj mä qenaywa egipcionakampi israelitanakampi jaljtayañatak uchäna. Egipcionak toqenjja chʼamakänwa, israelitanak toqensti qhanarakïnwa.

 Jehová Diosajj ‘amparam qota toqer loqtam’ sasaw Moisesar säna. Thayajj arum paqaraw wal thaytʼäna. Mar Rojo qotajj payaruw jaljtäna, taypejj thakëjjarakïnwa. Walja israelitanakaw waña oraqnam paskatapjjäna. Uksat aksatsa umajj perqjamaw saytʼäna.

Faraonan soldadonakapajj qota taypin waña oraqëkäna uknamwa israelitanakar arktapjjäna. Ukampis Jehová Diosaw egipcionakar jan waltʼayäna. Carronakapan llantanakapas jalstjjarakïnwa. Ukatwa soldadonakajj akham sasin arnaqasipjjäna: ‘¡Akat sarjjañäni! Jehová Diosaw markap laykojj jiwasampi nuwasiski’ sasa.

Diosajj Moisesar akham sänwa: ‘Amparam qota toqer loqtam’ sasa. Loqtäna ukhasti uma perqanakajj egipcionakaruw jaljjattäna. Faraonas soldadonakapas taqeniw jiwarapjjäna.

Qota khurkatansti, taqeniw Jehová Diosarojj mä cancionampi jachʼañchapjjäna. Akham sasaw cantapjjarakïna: ‘Jehová Diosaruw nayajj cantäjja, jupajj wali jachʼañchatawa. Caballorusa caballot saririrusa qotaruw jiwarayi’ sasa. Diosan markapajj cantasipkäna ukhajja, warminakajj thoqtʼasisaw panderetanakap tuktʼapjjäna. Cheqapun librëjjasajj taqeniw wal kusisipjjäna.