Dung dibege si Firaun naung borhat bangso Israel sian Mesir, muba ma muse rohana. Didok ibana ma tu tentarana, ‘Parade ma kareta porang asa talumba nasida! Ndang tapaloas hian nasida.’ Borhat ma si Firaun dohot tentarana mangalumba halak Israel.

Ditogu-togu Jahowa do bangsona. Dibahen do awan tingki arian dohot api tingki borngin. Diboan ma nasida tu Laut Rara, jala disuru ma bangso Israel berkemah disi.

Diida halak Israel ma nunga jonok si Firaun dohot tentarana. Di jolo ni nasida laut, jala di pudi nasida pasukan ni Mesir. Didok nasida ma tu si Musa, ‘Mate nama hita! Tumagon hian do hami ndang kaluar sian Mesir.’ Alai didok si Musa ma, ‘Unang mabiar hamu. Paluaon ni Jahowa do hita.’ Porsea situtu do si Musa tu Jahowa kan?

Disuru Jahowa ma halak Israel borhat. Di borngin i, dipapinda Jahowa ma awan i tu pudi ni halak Israel. Gabe golap ma di inganan ni halak Mesir. Alai tiur di inganan ni halak Israel.

Disuru Jahowa ma asa dibahen si Musa tanganna dompak laut. Dung i, dibahen Jahowa ma alogo na mansai gogo. Tarbola dua ma laut i, jala mahiang ma di tonga-tongana. Boi ma halak Israel mardalan sian i. Laut i ma di sabola kanan dohot kiri ni nasida.

 Diihuthon si Firaun dohot tentarana ma halak Israel sian dalan i. Alai, dibahen Jahowa ma marserak halak Mesir i. Marsegaan ma kareta porang ni nasida. Didokkon tentarana i ma, ‘Laho ma hita sian on! Jahowa do na marporang mangalo hita.’

Didok Jahowa ma tu si Musa, ‘Bahen ma muse tanganmi dompak laut.’ Pintor marsada ma muse aek i. Maup ma si Firaun dohot tentarana. Sude do nasida mate.

Di bariba ni laut i, marende ma bangso Israel mamuji Debata. Didok do di ende i, ‘Marende ma ahu tu Jahowa, ai marmulia situtu Ibana; hoda dohot na manghunduli dilonongkon tu bagasan laut.’ Tingki marende, manortori ma angka borua huhut maniop rebana. Marlas ni roha do nasida ala nunga malua nasida.